Kugwa kwa Alain-Guillaume Bunyoni: Politiki y’Imbere muri CNDD-FDD Iri He?

Abasesenguzi bibaza niba igifungo cya burundu cy’uwahoze ari Minisitiri w’Intebe kidahishura intambara y’ububasha n’ivugurura rikomeye muri CNDD-FDD.

Kugwa kwa Alain-Guillaume Bunyoni, wahoze ari umwe mu nkingi za mwamba za CNDD-FDD n’inzego z’umutekano z’u Burundi, gukomeje guteza impaka zikomeye mu gihugu no hanze yacyo. N’ubwo ubutegetsi buvuga ko igifungo cya burundu yakatiwe ari umwanzuro wigenga wafashwe n’inkiko, abasesenguzi benshi bakomeje kwibaza niba uru rubanza rutagaragaza byimbitse amakimbirane ya politiki yo imbere mu ishyaka riri ku butegetsi, cyane cyane intambara y’ububasha n’ivugurura rikomeye ryatangiye kugaragara nyuma y’uko Perezida Evariste Ndayishimiye afata ubutegetsi mu 2020.

Urukiko rw’Ikirenga rw’u Burundi rwakatiye Bunyoni igifungo cya burundu nyuma yo kumuhamya ibyaha birindwi bikomeye, birimo gushaka guhirika ubutegetsi, gucura imigambi yo kugirira nabi Perezida wa Repubulika, gusuzugura abayobozi b’igihugu, gutunga intwaro mu buryo bunyuranyije n’amategeko, guhungabanya imikorere ya Leta, kwaka inyungu zitemewe n’amategeko ndetse no kwikungahaza mu buryo bunyuranyije n’amategeko. Uburemere bw’ibi byaha bwakomeje gutuma uru rubanza rufatwa nk’urwihariye mu mateka ya politiki y’u Burundi.

Nyuma yo gufungwa, ubuzima bwa Bunyoni bwatangiye kujya mu kaga, by’umwihariko bitewe n’uko atahawe serivisi z’ubuvuzi zihagije, n’ubwo yari azwiho kurwara diabète, indwara idakira isaba kwitabwaho bihoraho. Abagize umuryango we hamwe n’imiryango iharanira uburenganzira bwa muntu bagaragaje impungenge ko kubura ubuvuzi buhoraho byagize ingaruka mbi ku buzima bwe, ibintu byafashwe nk’ikimenyetso cy’uko afatwa mu buryo butavugwaho rumwe.

Iyi myitwarire yakomeje kwamaganwa n’imiryango mpuzamahanga n’iyo mu karere iharanira uburenganzira bwa muntu, yashinje ubutegetsi bw’u Burundi kudaha agaciro amahame mpuzamahanga arengera abafunzwe. Iyo miryango yibukije ko, n’iyo umuntu yaba yarahamijwe ibyaha bikomeye gute, agomba guhabwa uburenganzira busesuye, harimo n’ubuvuzi bukwiye.

Mu gihe igitutu cy’amahanga cyarushagaho kwiyongera, hari amakuru avuga ko Perezida Ndayishimiye yatanze amabwiriza yo kwimura Bunyoni mu bitaro bitandukanye mu ibanga. Ku wa 27 Ukuboza 2025, Bunyoni yajyanywe mu bitaro bya Kira i Bujumbura, avuye mu Ntara ya Gitega aho yari amaze amezi abiri avurirwa. Ibi byabaye mu gihe inzego za Leta zitigeze zitanga ibisobanuro birambuye ku mpamvu n’imiterere y’izi ngendo z’ubuvuzi.

Abanenga ubutegetsi bavuga ko uku kuzengurutswa mu bitaro bishobora kuba byarakozwe mu rwego rwo guhosha igitutu cy’amahanga kurusha kuba ugushaka gutanga ubuvuzi bunoze kandi buboneye. Abasesenguzi ba politiki bagaragaje impungenge ko, hashingiwe ku buremere bw’igifungo cya burundu yakatiwe, hari icyizere gike ko ubutegetsi bufite ubushake bwo gukomeza kumufata nk’ufite uburenganzira busesuye nk’abandi bafunzwe.

Ibi byose byakomeje gushyira urubanza rwa Bunyoni mu rwego rwa politiki kurusha urw’ubutabera gusa, bigatuma rufatwa nk’ikimenyetso cy’impinduka n’ivugurura riri gukorwa mu miterere y’ububasha bwa CNDD-FDD.

Mu gihe Perezida Evariste Ndayishimiye akomeje gushimangira ko ubutabera bw’igihugu bwatanzwe mu bwigenge kandi ko amategeko yakurikijwe, abanenga ubutegetsi bo bavuga ko uko Alain-Guillaume Bunyoni afatwa mu gihe afunze bigaragaza isura iteye impungenge ku miyoborere, ubutabera n’imibanire y’ubutegetsi n’ishyaka riri ku butegetsi.

Kugwa kwa Bunyoni gukomeje gufatwa nk’ingaruka z’impinduka zikomeye zabaye mu bufatanye bwa politiki nyuma y’ifatwa ry’ubutegetsi rya Ndayishimiye mu 2020. Bunyoni, wahoze ari umwe mu bayobozi bakomeye mu nzego z’umutekano kandi wizerwaga cyane na nyakwigendera Perezida Pierre Nkurunziza, yaje kwisanga ari mu mwanya mushya, aho uwigeze kuba igihangange cya politiki yahindutse ikigeragezo cy’uko ubutegetsi bushya bumenya gukemura amakimbirane yo imbere mu ishyaka.

Ku bw’abasesenguzi, ikibazo cya Bunyoni kirenze umuntu ku giti cye: ni indorerwamo igaragaza uko politiki y’imbere muri CNDD-FDD iri kugenda ihinduka, uko ububasha buri gusaranganywa bundi bushya, n’ingaruka ibi bishobora kugira ku hazaza h’ubutabera n’imiyoborere y’u Burundi.

 Alain-Guillaume Bunyoni, CNDD-FDD, politiki y’u Burundi, igifungo cya burundu, Evariste Ndayishimiye, ubutabera, intambara y’ububasha

IMIHIGO NEWS