Bugesera: Urukiko rw’Ibanze rwa Nyamata rutegetse ko urubanza rwa Sheikh Bahame Hassan ruburanishwa mu muhezo

Umuyobozi w’Ikigo Ngororamuco cya Gitagata akurikiranyweho gukoresha ububasha ahabwa n’itegeko mu nyungu ze bwite no gukora ishimishamubiri rishingiye ku gitsina.

Urukiko rw’Ibanze rwa Nyamata mu Karere ka Bugesera rwategetse ko iburanisha ry’urubanza rwa Sheikh Bahame Hassan, Umuhuzabikorwa w’Ikigo Ngororamuco cya Gitagata, ukekwaho ibyaha birimo ishimishamubiri rishingiye ku gitsina no gukoresha ububasha ahabwa n’itegeko mu nyungu ze bwite, rikomereza mu muhezo, mu rwego rwo kurengera ibivugwa mu rubanza.

Sheikh Bahame Hassan yafashwe ku wa 16 Ukuboza 2025 nyuma y’iperereza ryakozwe n’Urwego rw’Igihugu rw’Ubugenzacyaha (RIB), ku makuru yavugaga ko yakoresheje umwanya yari afite ayobora Ikigo Ngororamuco cya Gitagata mu bikorwa bivugwaho gusaba no gukora ishimishamubiri rishingiye ku gitsina ku bagororerwa b’igitsina-gore.

Iburanisha ku ifunga n’ifungurwa ry’agateganyo ryari riteganyijwe ku wa 6 Mutarama 2026, ryaje gusubikwa nyuma y’uko Ubushinjacyaha butangaje ko bwitabiriye amahugurwa, ryimurirwa ku wa 8 Mutarama 2026.

Ubwo urubanza rwatangiraga, umucamanza amaze gusoma umwirondoro w’uregwa, umunyamategeko we, Me Nyembo Emeline, yasabye ko iburanisha ryakomereza mu muhezo bitewe n’uburemere n’imiterere y’ibyaha bivugwa muri uru rubanza.

Urukiko rwemeje ubu busabe, rutegeka ko abari mu cyumba cy’iburanisha bose basohoka, iburanisha rikomeza mu muhezo. Gusa, Urukiko rwasobanuye ko isomwa ry’icyemezo kizafatwa rizabera mu ruhame, nk’uko biteganywa n’amategeko agenga imiburanishirize y’imanza nshinjabyaha mu Rwanda.

Nyuma y’uko iburanisha rikomereje mu muhezo, Ubushinjacyaha bwagaragaje impamvu zituma Sheikh Bahame Hassan akekwaho ibyaha akurikiranyweho busaba kandi ko yafungwa by’agateganyo iminsi 30, kuko iperereza rigikomeje kandi ashobora kuribangamira aramutse akurikiranywe adafunze.

RIB yatangaje ko iperereza ry’ibanze ryagaragaje ko hari abagororerwa yahaga serivisi n’ibikoresho batagenerwa n’amategeko, agamije inyungu ze bwite zishingiye ku ishimishamubiri rishingiye ku gitsina.

Uyu mugabo akurikiranyweho ibyaha bibiri birimo gukoresha ububasha ahabwa n’itegeko mu nyungu ze bwite no gusaba cyangwa gukora ishimishamubiri rishingiye ku gitsina.

Itegeko ryo mu Rwanda rirwanya ruswa riteganya ko umuntu uhamijwe icyaha cyo gusaba cyangwa gukora ishimishamubiri rishingiye ku gitsina ahanishwa igifungo kiri hagati y’imyaka itanu n’irindwi n’ihazabu iri hagati ya 1.000.000 Frw ariko atarenza 2.000.000 Frw.

Iyo icyaha cyakorewe mu rwego rwo gukora ibinyuranyije n’amategeko, igihano cyiyongera kikaba igifungo kiri hagati y’imyaka irindwi n’icumi n’ihazabu iri hagati ya 2.000.000 Frw na 3.000.000 Frw.

Ku byerekeye gukoresha ububasha ahabwa n’itegeko, itegeko riteganya igifungo kiri hagati y’imyaka irindwi n’icumi n’ihazabu ishobora kugera kuri 10.000.000 Frw, bitewe n’inyungu zaba zarakurikiwe.

Sheikh Bahame Hassan yagizwe Umuhuzabikorwa w’Ikigo Ngororamuco cya Gitagata mu mwaka wa 2021, akaba yarigeze no kuyobora Akarere ka Rubavu. Urubanza rwe ruracyakurikiranwa n’inkiko, mu gihe hagitegerejwe icyemezo ku ifungwa n’ifungurwa ry’agateganyo, mu rwego rwo gukomeza iperereza no gutanga ubutabera bukwiye.