Gatsibo: Umunsi wa Mwarimu Wizihirijwe i Kiramuruzi, Ushimangira Ubufatanye mu Guteza Imbere Uburezi

Ku wa 12 Ukuboza 2025, Umuyobozi ushinzwe uburezi mu Murenge wa Kiramuruzi mu Karere ka Gatsibo ni we wafunguye ku mugaragaro ibirori byo kwizihiza Umunsi w’Umwalimu ku rwego rw’umurenge, Bangana n’abarimu Magana atanu(500) bakorera mu murenge wa kiramuruzi mu bigo bitandukanye. Uyu munsi watsindagirijwe n'insanganyamatsiko y’uyu mwaka ugira iti: “Uburezi ni umwuga usaba ubufatanye”, ukaba wanagaragarijwemo uruhare rwa kamenuza y’Ikoranabuhanga n’Ubugeni ya Byumba (UTAB), yohereje umwarimu wayo, Lecture Nyagatoma Pierre Celestine, wari intumwa y’uburezi mu rwego rwo gusangira ubunararibonye n’inama zigamije guteza imbere ireme n’inyigisho mu bigo by’amashuri mu Rwanda.

Mu Murenge wa Kiramuruzi wo mu Karere ka Gatsibo, ku wa 12 Ukuboza 2025 habereye ibirori byo kwizihiza Umunsi w’Umwalimu ku rwego rw’umurenge, kimwe mu bikorwa bifite amateka akomeye mu gushimangira ko umwalimu ari umutima w’iterambere ry’igihugu. Uyu munsi waranzwe n’ibikorwa bitandukanye byahuje abarimu baturutse ku bigo by’amashuri bitandukanye, hamwe n’abashyitsi batandukanye: Urwego rwa Dasso,Ingabo na Police barimo kandi n’intumwa ya kamenuza na minisiteri y’uburezi baremera umuturage utishoboye itungo rigufi.

Mbere y’uko ibirori bitangira ku mugaragaro, abarimu baturutse mu bigo bitandukanye byo mu Murenge wa Kiramuruzi bafashe umwanya wo kwifatanya nabo muri “Murare”, imyiyereko isanzwe iranga umutima wo gukunda igihugu no gushyigikira ibikorwa bifite inyungu rusange. Iyi Murare irimo indirimbo zitorera, indirimbo, Indirimbo zizwi nk'indirimbo zi isi ndetse n’izikangurira urubyiruko gukunda igihugu, yahaye uyu munsi umwihariko n’ubusabane bugaragaza ko umwalimu atari intiti gusa, ahubwo ari n’umufatanyabikorwa w’umuco n’indangagaciro.

Abarimu bagaragaje ko gutangira umunsi nk’uyu muri Murare bibaha imbaraga no guhuza umutima, bikabibutsa ko bafite inshingano y’uburezi idashoboka hatabayeho ubufatanye n’ubwitange.

Umuyobozi ushinzwe uburezi (SEI) mu Murenge wa Kiramuruzi

Umuyobozi ushinzwe uburezi (SEI) mu Murenge wa Kiramuruzi Bwana MAJYAMBERE Narcis ni we watangije ku mugaragaro ibirori, asezeranya ko ubuyobozi bw’inzego z’ibanze buzakomeza gushyigikira no kwegereza abarimu serivisi zibafasha kwigisha neza no kunoza imitegurire y’amasomo.

Uyu muyobozi yongeye kwibutsa ko umwalimu ari “inkingi” ya byose mu burezi, kandi ko igihugu kidashobora kugera ku iterambere ryifuzwa hatabayeho umwarimu uhabwa agaciro, amahugurwa ahagije, n’ibikoresho bihagije uko amateko ya minisiteri y'uburezi abitegeka.

Muri ibi birori, kamenuza y’Ikoranabuhanga n’Ubugeni ya Byumba(UTAB), Yatumye umwarimu wayo, (Lecture) NYAGATOMA Pierre Celestine, wari intumwa y’uburezi mu rwego rwo gusangira inama zishingiye ku bunararibonye mu rwego rwo kongera ireme n’inyigisho.

Mu kiganiro cye cyakiriwe n’uruhuri rw’amashyi, Lecture Nyagatoma yasobanuye ko ireme ry’uburezi ridashoboka hatabayeho ubufatanye mu nzego zitandukanye—hagati y’abarimu ubwabo, ubuyobozi bw’amashuri, ababyeyi ndetse n’inzego z’ubuyobozi bw’ibanze. Yabajije abarimu igihe uyu munsi watangiye kwizihizwa ku isi, Asobanura ko uyu munsi watangiye nyuma y'intambara ya kabiri y'isi mu itera mbere ry'ikinyagihumbi yarangiye mu mwaka 2015, Yagarutse ku kamaro k’iterambere ry’ikoranabuhanga ku mwalimu w’iki gihe, anashishikariza abarezi gukunda kwiga no kujyana n’ibihe bigezweho no gukoresha ubwenge buhangano neza (AI).

Yagize ati: “Umwarimu wa none si uguhagarara imbere y’abanyeshuri gusa, ahubwo ni umushakashatsi,Umuhanzi w'udushya kandi ufite ubushake bwo kwagura ubumenyi mu buryo buhoraho. Iyo ubufatanye bubayeho, abana bariga neza, umwalimu akigisha neza, n’igihugu kikabona umusaruro.’’

Abarimu basaga 500 bari bateraniye mu Marembo I Kiramuruzi bagarutse ku kababaro kabo kenshi bahura n’imbogamizi zitandukanye mu kazi, ariko basaba ko ubufatanye hagati yabo n’inzego z’uburezi bwakwiyongera.

Hari abarimu bagaragaje ko iri huriro riba rimwe mu mwaka ribafasha kwisuzuma, kumenyana, ndetse no guhanahana ubunararibonye mu kazi ko kwigisha.

DUSHIMANA Ange Pacience yagize ati:“Uyu munsi ufite agaciro kanini kuko udusubizamo icyizere n’imbaraga zo gukomeza urugendo rwo kurera u Rwanda. Kuba twirirwana, tugasabana,twitabira ibiganiro, bitwibutsa ko tudakora turi twenyine.”

Insanganyamatsiko y’uyu mwaka wa 2025 yakomoje ku ruhare rwa buri wese mu burezi, haba mu kwigisha, mu kuyobora, mu gutegura amasomo, mu gukoresha ikoranabuhanga, ndetse no mu gukora uburezi bufite ireme rihamye.

Abayobozi basabye ko iyi nsanganyamatsiko itazarangirira mu birori, ahubwo igakomeza kugaragara mu bikorwa bya buri munsi—mu ishuri, mu nama z’abarezi, no mu mikorere isanzwe mu kigo.

Ibirori byasoje n’ubutumwa bugenewe abarezi bose, bugamije kubashishikariza gukomeza umurava mu kazi kabo, gukunda igihugu, no gukorana ubufatanye bwa hafi, cyane cyane mu rugendo rwo guteza imbere ireme ry’uburezi.

Abarezi basabwe gukomeza kuba imbarutso mu byiza no mu mirimo yabo ya buri munsi, mu gihe ubuyobozi bw’inzego z’ibanze n’iz’uburezi bwijeje ko buzakomeza gufasha abarimu kugera ku mishyikirano igamije iterambere ryabo.

Utekereza iki kuri ibi? Tanga igitekerezo cyawe muri comments.

Imihigonews.rw