Zimbabwe Yafashe Icyemezo Gishya ku Mabuye y’Agaciro: Kohereza hanze Lithium n’andi Mabuye Idatunganyijwe Birahagaritswe

Guverinoma ya Zimbabwe yatangaje ko guhera ku wa 25 Gashyantare 2026 yahagaritse burundu kohereza hanze amabuye y’agaciro yose adatunganijwe, harimo lithium, mu rwego rwo kongera igenzura ku mutungo kamere wayo no guteza imbere inganda zitunganya ayo mabuye imbere mu gihugu. Iri tangazo ryasohotse ku wa 26 Gashyantare 2026, rikaba rishishikariza amasosiyete acukura amabuye kubahiriza amabwiriza mashya.

Zimbabwe, kimwe mu bihugu bikungahaye ku mabuye y’agaciro, by’umwihariko lithium, yagiye yohereza menshi hanze atunganyije, akenshi ajyanwa mu nganda z’abanyamahanga. Guverinoma y’iki gihugu ubu yashyizeho amategeko mashya agamije kongera agaciro k’ayo mabuye imbere mu gihugu, no guteza imbere inganda z’imbere mu gihugu zitunganya ayo mabuye.

Minisitiri w’Ubucukuzi muri Zimbabwe, Polite Kambamura, yavuze ko iki cyemezo gifashwe mu nyungu z’igihugu, gukoresha neza umutungo kamere no kongera inyungu igihugu kiyavanamo.

Yagize ati:“Gutunganyiriza amabuye y’agaciro imbere mu gihugu bizadufasha kongera agaciro kayo, kuyohereza ku masoko mpuzamahanga ku giciro cyiza no kongera inyungu igihugu kiyavanamo.”

Zimbabwe iri mu bihugu bya mbere ku Isi bikungahaye kuri lithium, aho ububiko bw’igihugu bugera kuri ton milioni 126. Lithium ikoreshwa cyane mu gukora batiri z’imodoka zikoresha amashanyarazi, bityo ikaba ari umutungo w’ingenzi ku bukungu n’amasoko mpuzamahanga.

Ubu, amasosiyete menshi y’Abashinwa niyo acukura lithium muri Zimbabwe, bayohereza hanze, cyane cyane mu Bushinwa. Guverinoma y’iki gihugu ishaka ko hashyirwaho inganda z’imbere mu gihugu zitunganya amabuye, bityo inyungu igasigara muri Zimbabwe.

Minisitiri Kambamura yongeraho ko amabwiriza azakomeza kubahirizwa kugeza igihe ibigo bicukura amabuye byubahirije ibyo Leta isaba:

“Kohereza hanze amabuye adatunganijwe si amahitamo agishoboka. Abashoramari bagomba kubahiriza amabwiriza mashya niba bashaka gukomeza gukorera muri Zimbabwe.”

Uretse lithium, Zimbabwe ikungahaye ku yandi mabuye y’agaciro nka umuringa, rhodium, palladium na nickel. Banki y’Isi igaragaza ko ubucukuzi bw’amabuye y’agaciro ari urwego rwa kabiri rwinjiza amafaranga menshi mu bukungu bwa Zimbabwe, rutanga 14,3% by’Umusaruro Mbumbe w’Igihugu (GDP).

Ingaruka n’Impamvu

• Icyemezo cya Zimbabwe kirashaka kongera agaciro k’amatungo kamere no guteza imbere inganda z’imbere mu gihugu.
• Bizatuma inyungu iva mu mabuye y’agaciro iguma mu gihugu aho kuba yoherezwa hanze idatunganyijwe.
• Byongera ubushobozi bw’igihugu mu gucunga umutungo kamere no kwirinda ko abanyamahanga babyinjiza ku giciro gito.

 Iyi gahunda ya Zimbabwe ni intambwe ikomeye mu gushaka ubukungu burambye bw’amatungo kamere no gushyira imbere inganda z’imbere mu gihugu. Abashoramari n’abacukura amabuye y’agaciro bagomba kubahiriza amabwiriza mashya, mu gihe Leta y’igihugu izakomeza kugenzura ishyirwa mu bikorwa ryayo.

IMIHIGONEWS