Uburayi: U Bufaransa na Espagne bikomeje kwibasirwa n'inkongi z'umuriro, abarenga ibihumbi 250 bamaze kwimurwa

Inkongi z'umuriro france na esipanye

Inkongi z'umuriro zikomeje gukwirakwira mu majyepfo y'uburengerazuba bw'u Bufaransa no mu bice bitandukanye bya Espagne zatumye abaturage barenga 250,000 bava mu byabo, mu gihe ubuyobozi bw'ibyo bihugu bukomeje kongera ingamba zo kuzimya umuriro no kurinda ubuzima bw'abaturage.

Abashinzwe kuzimya inkongi bavuga ko umuriro ukomeje gukwirakwira kubera umuyaga mwinshi n'ubushyuhe bukabije, ibintu bituma ibikorwa byo kuwuzimya birushaho kugorana.
Mu Bufaransa, umuriro wari ugeze hagati ya kilometero 40 na 50 uvuye mu mujyi wa Bordeaux, aho umwotsi mwinshi wageze muri uwo mujyi, abaturage bamwe bagatangaza ko umwuka wahindutse mubi kubera umwotsi ukomoka ku nkongi.

Isoko: NASA FIRMS/LANCE 26 July 2026 updated                       IMIHIGONEWS

Mu turere twa Gironde na Landes, abaturage bagera ku 200,000 bamaze kwimurwa mu rwego rwo kubungabunga umutekano wabo, mu gihe igisirikare cy'u Bufaransa cyoherejwe gufasha abashinzwe kuzimya inkongi no gukumira ko umuriro ukomeza gukwira.

Muri Espagne, aho leta yatangaje ibihe bidasanzwe, abaturage bagera hafi ku 60,000 bamaze kwimurwa mu bice bya Madrid na Ávila, mu gihe abandi barenga 28,000 bagisabwa kuguma mu ngo zabo.

N’ubwo ikirere cyatangiye guhinduka kigafasha ibikorwa byo kuzimya umuriro, Minisitiri w'Intebe Pedro Sánchez yavuze ko igihugu kigifite ibihe bikomeye imbere, kuko umuyaga ukomeje guteza ibibazo ndetse hashobora no kugwa inkuba.

Ubuyobozi bwemeje ko umugabo bikekwa ko yari afite imyaka iri mu 70 yapfiriye mu nkongi yabereye hafi ya Valencia, nyuma yo gusangwa mu modoka ye n'abashinzwe ubutabazi.

Izi nkongi zagize n'ingaruka ku marushanwa ya Tour de France, aho agace ka nyuma k'iri siganwa kagabanyijwe kugira ngo inzego z'umutekano zibanze mu gutabara abaturage no kuzimya umuriro.

Perezida w'u Bufaransa, Emmanuel Macron, ateganya kuyobora inama yihutirwa igamije gusuzuma ingamba zo guhangana n'inkongi zirenga 30 zikomeje kwibasira igihugu, mu gihe Umuryango w'Ubumwe bw'u Burayi watangiye kohereza indege n'ibindi bikoresho byo gufasha u Bufaransa na Espagne mu bikorwa byo kuzimya umuriro.

Abahanga mu bijyanye n'imiterere y'ikirere bagaragaza ko kwiyongera kw'ubushyuhe ku Isi no gukomeza kugaragara kw'ibihe by'izuba rikabije ari bimwe mu bituma inkongi z'umuriro zirushaho kugira ubukana no gukwirakwira vuba, cyane cyane mu mpeshyi.

Isoko: NASA FIRMS_2026-07-26,2026-07-26[@-0.559,44.848,14.000z]

Amakuru atangwa na NASA kandi binyuze muri sisitemu ya Fire Information for Resource Management System (FIRMS) agaragaza ko ku wa 26 Nyakanga 2026 hakomeje kugaragara ahantu henshi hafite inkongi z'umuriro mu majyepfo y'uburengerazuba bw'u Bufaransa no mu bice bya Espagne, bikemeza ubukana bw'izi nkongi n'uko zikomeje gukwirakwira.

Mu gihe ibikorwa byo kuzimya inkongi bikomeje, inzego zishinzwe ubutabazi mu Burayi zikomeje gusaba abaturage gukurikiza amabwiriza yo kwimuka igihe atanzwe, mu rwego rwo kurinda ubuzima bwabo no kugabanya ingaruka z'izi nkongi. Ubuyobozi bw'ibihugu byombi buvuga ko bukomeje gukurikiranira hafi uko ikirere gihagaze no kongera imbaraga mu bikorwa byo gutabara no kuzimya umuriro.

Yanditswe  UWARIVUZE Emmanuel
Journalist - IMIHIGONEWS