Gatsibo: Inzu mberabyombi ya miliyoni 142 Frw yubakiwe urubyiruko rwa Rwimbogo

Inzu ya salle y'urubyiruko mu murenge wa Rwimbogo mu karere ka Gatsibo 

Akarere ka Gatsibo karangije kubaka inzu mberabyombi y'urubyiruko mu Murenge wa Rwimbogo yatwaye miliyoni zisaga 142 z'amafaranga y'u Rwanda, ikaba ifite ubushobozi bwo kwakira abantu bagera kuri 800 bicaye neza. Ubuyobozi bw'Akarere buvuga ko iyi nyubako izafasha urubyiruko guteza imbere impano zarwo, kwihangira imirimo no kurushaho kugira uruhare mu bikorwa by'iterambere.

Kuri uyu wa Kane, tariki ya 23 Nyakanga 2026, ubuyobozi bw'Akarere ka Gatsibo bwagaragaje ko bwizeye ko iyi nzu mberabyombi izahinduka igicumbi cy'iterambere ry'urubyiruko rwo mu Murenge wa Rwimbogo n'ituranye na wo. Uretse kwakira ibikorwa by'imyidagaduro n'ubuhanzi, izajya inifashishwa mu nama, amahugurwa n'ibikorwa bitandukanye bihuza inzego za Leta, abikorera n'abaturage.

Inzu mberabyombi yubatswe mu gihe cy'umwaka umwe, ikaba yaruzuye itwaye miliyoni zisaga 142 Frw. Ifite ubushobozi bwo kwakira abantu bagera kuri 800 bicaye neza, ibintu ubuyobozi buvuga ko bizafasha mu gutegura ibikorwa binini by'iterambere no guteza imbere impano z'urubyiruko.

Umuyobozi w'Akarere ka Gatsibo wungirije ushinzwe Iterambere ry'Ubukungu, Sekanyange Jean Leonard, yasabye urubyiruko kubyaza umusaruro aya mahirwe rwahawe, rugakoresha neza iyi nyubako ndetse n'ibikorwaremezo biyikikije.

Yagize ati:

"Icyo tubasaba ni ukubyaza umusaruro iyi nzu mberabyombi n'ibibuga biyikikije. Abafite impano bazigaragaze, ariko banabungabunge ibi bikorwaremezo kugira ngo bizagirire akamaro n'abazadukurikira. Twifuza ko hazavamo abakinnyi, abaririmbyi, abasizi n'abandi banyempano bazahesha ishema Rwimbogo n'Akarere ka Gatsibo."

Umunyamabanga Nshingwabikorwa w'Umurenge wa Rwimbogo, Musonera Emmanuel, yavuze ko iyi nzu izatanga amahirwe mashya ku rubyiruko yo kwidagadura, guhanga udushya no kwihangira imirimo, aho kwishora mu biyobyabwenge n'izindi ngeso mbi.

Yasobanuye ko urubyiruko ruzajya ruhurira muri iyi nyubako rugahugurirwa ingingo zitandukanye zirimo ubuzima bw'imyororokere, ubuzima bwo mu mutwe, kwihangira imirimo n'indi myigire igamije kubafasha kuba abaturage bafite uruhare mu iterambere ry'Igihugu.

Uretse ibikorwa by'urubyiruko, iyi nzu izajya inakira inama z'inzego za Leta n'iz'abikorera, amahugurwa, ibirori n'ibindi bikorwa by'iterambere, bikazafasha abaturage kubona serivisi n'ibikorwa bitandukanye hafi yabo.

Kubakwa kw'iyi nzu mberabyombi ni imwe mu ntambwe Akarere ka Gatsibo kagaragaza ko kateye mu gushora imari mu rubyiruko no kurwegereza ibikorwaremezo bibafasha guteza imbere impano, ubumenyi n'imibereho myiza. Biteganyijwe ko izaba igicumbi cy'ibikorwa bitandukanye bizafasha urubyiruko rwa Rwimbogo n'utundi duce duturanye kurushaho kugira uruhare mu iterambere ry'Akarere n'iry'Igihugu muri rusange.

IMIHIGONEWS