GATSIBO: Ubuyobozi bw’Ishuri rya GS Ntete bwakanguriye abanyeshuri kwitabira Club Human anti Violence

Ku wa Gatatu tariki ya 14 Mutarama 2026 ubuyobozi bwa Club Human anti Violence bwasuye abanyeshuri biga mu Ishuri rya GS Ntete, riherereye mu Murenge wa Kiramuruzi Akarere ka Gatsibo mu Ntara y’Iburasirazuba hagamijwe kubakangurira kwitabira iyi club kubigisha kurwanya ihohoterwa rikorerwa abana no kubamenyesha uburenganzira bwabo.

Uru ruzinduko rwari rugamije gukomeza gushimangira uruhare rw’amashuri mu kurengera umwana no kumurinda ihohoterwa rikorwa haba mu muryango no ku ishuri, binyuze mu biganiro byubaka, ubukangurambaga n’ibikorwa bifatika bikorwa n’abanyeshuri bagize Club Human anti Violence.

Umukangurambaga wa Club Human Violence Bwana IRASUBIZA Patrick wari waje avuye ku cyicaro gikuru cy’iyi club giherereye i Rwankuba mu Murenge wa Murambi Akarere ka Gatsibo yagaragaje ko iyi club igira uruhare runini mu gufasha abana kumenya no guharanira uburenganzira bwabo.

Kugeza ubu, Club Human anti Violence imaze gufungura imiryango yayo mu bigo by’amashuri birindwi byo mu Karere ka Gatsibo birimo GS Ntete, GS Nyabisindu, GS Rwankuba, GS Rwimitereri, GS Nyagatozu, GS Rubona na GS Gakoni Catholic bafite intego nyamukuru ikaba ari ukugera mu bigo byose by’aka karere.

Mu Ishuri rya GS Ntete, iyi club imaze kugira abanyamuryango barenga 100 aho ubuyobozi bwayo n’ubw’ishuri byagaragaje ko intego ari ugushishikariza abanyeshuri bose kuyitabira kubera akamaro kayo mu mibereho myiza y’abana.

Mu kiganiro yagejeje ku banyamuryango, Bwana IRASUBIZA Patrick yibukije abanyeshuri ko ihohoterwa rikorerwa abana ritemewe n’amategeko y’u Rwanda, asobanura ko hari ingingo ziri mu mategeko ahana ibyaha zihanisha ibihano bikomeye ikintu cyose kijyanye n’ihohoterwa rikorerwa abana.

Yagize ati:

• Umwana afite uburenganzira bwo kwiga mu mutekano no kudahohoterwa;
• Buri mwana akwiye kumenya aho ageza ikibazo cy’ihohoterwa akitabirwa kandi agatabarirwa ku gihe;
• Club Human anti Violence igamije kumva ibibazo abana bahura na byo mu miryango yabo no kubafasha kubona ibisubizo.

Yongeyeho ko mu byo abana bagaragaje, bimwe mu bibazo bibugarije usanga bishingiye ku byo babona mu ngo iwabo, bityo hakenewe ubufatanye bw’inzego zitandukanye mu kubarinda.

Yasobanuye ko intego nyamukuru y’iyi club ari ukurandura ihohoterwa rikorerwa abana, kubigisha uburenganzira bwabo no kubafasha kugira ijwi mu bibakorerwa byose.

Umuyobozi uhagarariye abanyeshuri mu kigo ku rwego rw’abanyeshuri, mu ijambo rye yashimangiye uruhare Club Human anti Violence imaze kugira mu kubafasha no gusobanukirwa ibibazo byabo ndetse no mu kubona ibisubizo ariko yasaba ubuyobozi bwa club kubashakira imfashanyigisho zibafasha mu bikorwa byabo bya buri cyumweru. Yavuze kandi ko bibagora kubona insanganyamatsiko zo kuganiraho ku munsi wa Gatatu ari wo iyi club iteraniraho.

Umuyobozi wungirije w’Ishuri rya GS Ntete ushinzwe imyitwarire y’abanyeshuri, Bwana NGIRINSHUTI Nzabitega Samuel, yashimye uruhare rwa Club Human anti Violence asaba abanyeshuri gukomeza kuyitabira no kuyigira iyabo.

Yagize ati:“Byaba byiza buri munyeshuri wese abaye muri iyi club, kuko imukangurira kumenya uburenganzira bwe n’uburenganzira bwa bagenzi be. Iyo habaye ihohoterwa iryo ari ryo ryose, umwana araryimenya kandi akamenya aho arigeza kugira ngo atabarwe mu buryo bwihuse.”

IMIHIGO NEWS yabajije uyu muyobozi icyatumye yemera ko iyi club ikorera muri GS Ntete, asubiza ko yabitewe n’uko yabonye ko hari abana benshi badafite ubumenyi buhagije ku burenganzira bwabo.

Yagize ati:“Hari abana benshi usanga batazi uburenganzira bwabo, ntibagire abo babibwira kandi batazi n’aho babigeza. Iyi club ibafasha kumenya ibyo bagomba gukora no kumenya abo bagana.”

Yakomeje agaragaza ko abanyeshuri bazungukira byinshi muri iyi club birimo ubumenyi bwo guharanira uburenganzira bwabo, kubaha abandi no kwirinda ihohoterwa, nubwo bagaragaje bimwe mu bibazo bahura na byo birimo kutabona imfashanyigisho zihagije, avuga ko ubuyobozi bw’ishuri buzafatanya n’ubwa club kubafasha aho bishoboka hose.

Ikiganiro cyasojwe abanyamuryango ba Club Human anti Violence baherekeje umukangurambaga wabo ariko mbere basura umurima w’imboga bahinzwe nk’ikimenyetso cy’uko iyi club idashyira imbere amagambo gusa ahubwo inagira uruhare mu bikorwa bifatika bifasha ishuri n’abanyeshuri.

Club Human anti Violence yashinzwe na Madamu Sabrina Joy Smith, ufite ubwenegihugu bwa Australia ayishinze ku rwego mpuzamahanga agamije kurwanya ihohoterwa rikorerwa abana guteza imbere uburenganzira bwa muntu no kubaka sosiyete ishingiye ku mahoro n’ubwubahane by’umwihariko muri Afurika no mu Rwanda.

Iyi club yaje kugera mu Rwanda mu rwego rwo gushyigikira gahunda z’igihugu zo kurengera umwana cyane cyane mu mashuri, aho abana bigishwa kumenya uburenganzira bwabo bakiri bato.

Ubuyobozi bwa GS Ntete n’ubwa Club Human anti Violence bwagaragaje ko ubufatanye buri hagati yabo buzafasha ishuri gukomeza kuba ahantu hizewe hatabera ihohoterwa iryo ari ryo ryose bityo abana bagakura bafite ubumenyi icyizere n’indangagaciro nziza. Abanyeshuri basabwe kudasigara inyuma, ahubwo bakitabira iyi club igamije kurengera ejo hazaza habo.

IMIHIGO NEWS | With in the best News