NIGERIA: Polisi ya Adamawa Yatahuye Abantu Babiri Bakekwaho Kwica Abagore Batatu mu Makimbirane y’Abaturage

Polisi yo muri Leta ya Adamawa muri Nijeriya yatangaje ko yataye muri yombi abantu babiri bakekwaho kugira uruhare mu rupfu rw’abagore batatu bishwe mu makimbirane y’abaturage yongeye kuba mu bice bya Lamurde Local Government Area, mu ijoro ryo kuri uyu wa Gatandatu tariki ya 3 Mutarama 2026.

Aya makimbirane ashingiye ku kutumvikana kw’abaturage bo mu bwoko bwa Bachama na Chobo amaze igihe agaragara muri aka gace, aho mu kwezi gushize yari yarahitanye ubuzima bw’abantu barenga 10. Polisi ivuga ko yihutiye gutabara kugira ngo irinde ko umutekano utarushaho kuzamba.

Mu itangazo ryashyizwe ahagaragara ku gicamunsi cyo kuri iki Cyumweru, Umuvugizi wa Polisi muri Leta ya Adamawa, Suleiman Nguroje, yatangaje ko abagore batatu bagabweho igitero bakicwa bari mu mirima yabo iri hafi y’umudugudu wa Tigno mu Karere ka Lamurde.

Nguroje yavuze ko abaketswe muriiyimirwano ari William Joshua w’imyaka 30 na Ezekiel Luka w’imyaka 23 bombi batuye mu mudugudu wa Tigno batawe muri yombi nyuma y’amakuru yizewe Polisi yahawe.

Yongeyeho ko mu byo Polisi yafashe harimo:

• amasasu 29 atarakoreshwa,
• magazini imwe y’imbunda yo mu bwoko bwa AK-47,
• amafaranga angana na Naira 90,000 yahomuri Nijeriya n’ibindi bikoresho byafatanywe abaketswe.

Komiseri wa Polisi muri iyo Leta CP Dankombo Morris yasabye abaturage agahende ko gutuza no kwirinda kwihorera abizeza ko Polisi iri gukora ibishoboka byose mu buryo bwemewe n’amategeko kugira ngo ababigizemo uruhare bose n’ababishishikarije bagenzi babo bashyikirizwe ubutabera.

Aka gace ka Lamurde LGA kamaze igihe kagaragaramo amakimbirane akomoka ku ntambara z’abaturage, aho mu kwezi gushize abantu barenga 10 barimo abagore batanu bahasize ubuzima. Polisi ivuga ko ingamba z’umutekano zakajijwe muri ako gace, mu rwego rwo gukumira ko habaho andi makimbirane ashobora guhungabanya umutekano w’abaturage.

IMIHIGONEWS| With in the best News