Abanyarwanda batuye muri Sénégal bizihije Umunsi w’Intwari bakora umuganda i Dakar

Mbere yo kwizihiza umunsi w'intwari hakozwe umuganda

Dakar mu gihugu cya Sénégal giherereye muburengerazuba bushyira amajyaruguru ya afurika, Abanyarwanda batuye muri Sénégal bizihije Umunsi w’Intwari z’u Rwanda bakora umuganda rusange ahubatse Urwibutso rwa Afurika ruzwi nka Monument de la Renaissance Africaine, ruherereye muri Komini ya Ouakam mu Mujyi wa Dakar.

Iki gikorwa cyabaye ku wa 7 Gashyantare 2026, ku bufatanye bwa Ambasade y’u Rwanda muri Sénégal n’ubuyobozi bwa Monument de la Renaissance Africaine, kikaba cyari kigamije guha icyubahiro intwari z’u Rwanda no gusigasira indangagaciro z’ubumwe, umurimo n’ubuvandimwe bw’Abanyafurika.

Uyu muganda witabiriwe n’abayobozi batandukanye barimo abahagarariye Minisiteri y’Umuco, Ubukorikori n’Ubukerarugendo muri Sénégal, abayobozi b’Umujyi wa Dakar, abahagarariye Ikigo cya Sénégal gishinzwe guteza imbere ubukerarugendo (ASPT), abayobozi ba Komini ya Ouakam, inshuti z’u Rwanda ndetse n’Abanyarwanda batuye muri iki gihugu.

Yataramiye abaribitabiriye uyu muhango

Ambasaderi w’u Rwanda muri Sénégal, Festus Bizimana, yasobanuye ko guhitamo umuganda nk’igikorwa cyo kwizihiza Umunsi w’Intwari bifite igisobanuro gikomeye mu mateka n’indangagaciro by’Abanyarwanda.

Ati:“Nk’uko buri wese agira uruhare mu gutuma imibereho ya benshi irushaho kuba myiza binyuze mu muganda atanga, ni na ko intwari z’igihugu cyacu zatanze imbaraga n’ubuzima bwazo kugira ngo uyu munsi tube dufite igihugu gifite umutekano n’icyerekezo.”

Yakomeje yibutsa ko gukora umuganda ari uburyo bwo kwibuka no guha agaciro igitambo cy’intwari zaharaniye kubaka u Rwanda, bityo indangagaciro zabyo zigakomeza kubaho mu buzima bwa buri munsi.

Umuyobozi Mukuru ushinzwe Umuco muri Minisiteri y’Umuco, Ubukorikori n’Ubukerarugendo muri Sénégal, Bwana Abdou Diata, yashimye cyane iki gikorwa, agaragaza ko Sénégal yubaha intwari z’u Rwanda nk’izayo.

Ati:“Kuba mwahisemo kwizihiriza intwari z’u Rwanda aha hantu h’ingenzi mu mateka ya Afurika, byatweretse ko ubuvandimwe bw’Abanyafurika ari yo nkingi y’iterambere ryacu. Ibyo ni byo uru rwibutso ruhagarariye.”

Abandi bayobozi baganirije abitabiriye iki gikorwa, barimo abahagarariye Umujyi wa Dakar n’uhagarariye Abanyarwanda batuye muri Sénégal, bose bagarutse ku uruhare rukomeye rw’intwari mu kubaka ibihugu no guteza imbere umugabane wa Afurika muri rusange.

Iki gikorwa cyaranzwe n’umuvugo witwa “Imihigo y’Intwari”, wasomwe n’abana batatu bava inda imwe, basingiza u Rwanda n’intwari zarwo. Uwo muvugo washimishije benshi bitabiriye umuganda.

Ambasaderi Bizimana yashimiye abo bana, abaha ibihembo, anashishikariza urubyiruko rw’Abanyarwanda batuye muri Sénégal gukoresha impano zabo n’imbaraga mu kwamamaza u Rwanda no gusigasira umuco warwo.

U Rwanda na Sénégal bisanzwe bifitanye umubano mwiza umaze imyaka myinshi, by’umwihariko kuva mu 2011, ubwo u Rwanda rwafunguraga Ambasade i Dakar, bikaba byarafunguye amarembo y’imikoranire mu nzego zitandukanye.

Mu Kwakira 2025, Perezida wa Sénégal Diomaye Faye yagiriye uruzinduko mu Rwanda, aho we na Perezida Paul Kagame bayoboye umuhango wo gusinya amasezerano y’imikoranire mu nzego zirimo ubuhinzi, ubworozi, iterambere n’ubuzima.

Na none, ku wa 31 Kanama 2025, Perezida Kagame yagiriye uruzinduko muri Sénégal, yitabira Inama Nyafurika ku kwihaza mu biribwa (AFS). Muri uwo mwaka kandi, ibihugu byombi byasinye amasezerano ajyanye n’ubwikorezi bwo mu kirere, agamije korohereza ingendo n’ubuhahirane hagati y’abaturage.

Sénégal ni kimwe mu bihugu byo muri Afurika y’Iburengerazuba bibarizwamo Abanyarwanda benshi, barimo abajyanywe n’amasomo, abakozi b’inzego zitandukanye ndetse n’abahageze mu myaka isaga 40 ishize, bakomeje kugira uruhare mu guteza imbere umubano w’ibihugu byombi.

IMIHIGONEWS