KSP Rwanda na RTB Bashyize ku Isoko Abanyeshuri 65 Bize Multimedia Production

Umuyobozi wa KSPRWANDA Bwana UWIANA Saleh

Ku wa Kane tariki ya 30 Mutarama 2026, ikigo KSP Rwanda, ku bufatanye na Rwanda TVET Board (RTB) binyuze mu nkunga ya Skills Development Fund (SDF) cyashyize ku isoko ry’umurimo abanyeshuri 65 basoje amasomo ya Multimedia Production.

Abo banyeshuri barimo 24 bize ku ishami rya Kayonza (Yego Center) ndetse na 41 bize i Kigali mu byiciro bitandukanye by’amasomo ajyanye n’itangazamakuru rishingiye ku ikoranabuhanga n’imyidagaduro.

Ibi birori byabereye mu Karere ka Kayonza, byitabirwa n’inzego zitandukanye zirimo ubuyobozi bw’Akarere ka Kayonza, buhagarariwe na Djaf Bututa Muda, uhagarariye Inama y’Igihugu y’Urubyiruko (NYC) ku rwego rw’Akarere, Pacifique Rukundo, ndetse n’Umuhuzabikorwa wa Yego Center, Ntirandekura Elie.

Mu rwego rwo gutegura urubyiruko neza ku isoko ry’umurimo, ibi birori byanahuriyemo abahanzi n’abakora mu rwego rw’imyidagaduro, bagiranye ibiganiro (panel discussions) bigamije gutinyura urubyiruko no kurusangiza ubunararibonye ku mahirwe ari mu Creative Industry.

Mu batanze ibiganiro harimo Ben Rurangirwa, umwanditsi akaba n’umukinnyi wa filime mu Rwanda, ndetse n’uhagarariye ishyirahamwe ry’abahanzi mu Rwanda muri Minisiteri y’Urubyiruko n’Ubuhanzi (MOYA), hamwe na Rachel Muramira, wigeze gukorera ibitangazamakuru bitandukanye, ubu akaba akora mu bijyanye na content creation ku mbuga nkoranyambaga.

Dr Ben Rutangirwa arikumwe n'abanyeshuri bafata ifoto

Ben Rurangirwa yatangaje ko yiteguye gufasha urubyiruko 10 rufite imishinga myiza mu rwego rwa sinema, kugira ngo ruyibyaze umusaruro no kuyigeza ku isoko.

Urubyiruko rwasoje amasomo rwashimiye cyane RTB na Skills Development Fund, ruvuga ko iyo hatabaho ubu bufasha, kugera ku nzozi zabo byari bigoye kubera ubushobozi buke bw’imari.

Mu ijambo rye, Umuyobozi wa KSP RwandaBwana Saleh Uwimana, yashimiye abanyeshuri basoje amasomo n’abafatanyabikorwa b’ikigo, by’umwihariko RTB, ku mikoranire myiza, anagaragaza ko binyuze muri iyi gahunda, urubyiruko 20 rwabonye buruse yo kwiga rwishyurirwa 100%.

Yongeyeho ko KSP Rwanda yiteguye gukomeza gutanga ubumenyi butanga imirimo, hagamijwe gufasha urubyiruko guhanga imirimo no kugabanya ubushomeri binyuze mu rwego rw’ubuhanzi n’inganda zihanga (Creative Industry).