Namenye Patrick yagizwe Umuyobozi Mukuru wa Radio SK FM, asimbura Uwera Jean Maurice

Uwahoze ari Umunyamabanga Mukuru wa Rayon Sports, Namenye Patrick, azayobora SK FM 93.9 mu nshingano z’imiyoborere y’iyi radio.

Uwahoze ari Umunyamabanga Mukuru wa Rayon Sports, Namenye Patrick, yatangajwe nk’Umuyobozi Mukuru wa Radio SK FM 93.9, asimbura Uwera Jean Maurice wahise agirwa Umuvugizi Wungirije wa Guverinoma y’u Rwanda, ku wa Kane tariki ya 05 Gashyantare 2026.

Uyu muyobozi mushya wa SK FM azayobora radio izwi cyane mu biganiro bya siporo mu Rwanda, akoresheje ubunararibonye bwe mu buyobozi no mu mikino. Ubuyobozi bwa SK FM bwamwakiriye mu butumwa buha ikaze, bumwifuriza ishya n’ihirwe mu nshingano ze.

Uwera Jean Maurice, wasimbuwe na Namenye, yari Umuyobozi Mukuru w’iyi radio kuva yashingwa mu ntangiro z’umwaka wa 2025, mbere yo kugirwa Umuvugizi Wungirije wa Guverinoma.

Namenye Patrick yamenyekanye cyane muri ruhago y’u Rwanda ubwo yari Umunyamabanga Mukuru wa Rayon Sports guhera muri Nzeri 2022, akaza gusezera muri 2024. Yagize kandi uruhare rukomeye mu gushaka amasoko n’abafatanyabikorwa bunganiraga ikipe ye.

Uretse ubunararibonye mu mikino, Namenye yahoze ari umunyamakuru w’imikino kuri Radio Salus mu Karere ka Huye, bituma benshi bamufitiye icyizere ko azatanga umusaruro mwiza mu nshingano nshya.

Ubuyobozi bwa SK FM bwamwakiriye buvuga buti:“Namenye Patrick ni umuyobozi mushya wa SK FM93.9. Tumwifurije ishya n’ihirwe mu nshingano ze nshya!”

Inshingano nshya za Namenye Patrick yitezweho guteza imbere ibiganiro bya siporo muri SK FM, kongera umubare w’abakunzi b’iyi radio no gukomeza guteza imbere ubunyamwuga mu itangazamakuru ry’imikino mu Rwanda.