Rwanda: Leta yongeje umusanzu wa Mituelle de Santé, Mituweli igeza ku FRW 20,000 bitewe n’urwego

Ubwisungane mu kwivuza Mituweli (RSSB)

Kigali, Gashyantare 2026 – Guverinoma y’u Rwanda yashyizeho impinduka ku musanzu w’ubwisungane mu kwivuza buzwi nka Mituelle de Santé cyangwa Mituweli, aho ingano y’umusanzu w’umunyamuryango yatangwaga kuva ku FRW 3,000 ubu izajya itangirwa ku FRW 4,000, FRW 5,000, FRW 8,000 kugeza kuri FRW 20,000 bitewe n’urwego umuntu arimo muri Sisiteme Imibereho (Dynamic Social Registry).

Ibi byatangajwe nyuma y’itangwa ry’Iteka rya Minisitiri nº 002/26/10/TC ryo ku wa 16/02/2026, ryasohotse mu Igazeti ya Leta n° Idasanzwe yo ku wa 23/02/2026, rishyiraho ingano n’uburyo bwo gutanga umusanzu w’ubwisungane mu kwivuza.

Iri teka rivuga ko umusanzu ugomba gutangwa buri mwaka n’umunyamuryango n’iyo atarwaye mu mwaka w’ubwisungane mu kwivuza. Ukoresheje urwego rw’iyandikisha muri Sisiteme Imibereho, umusanzu wagenewe buri rwego ni:

• Urwego rwa mbere: FRW 4,000 ku mwaka, wishyurwa na Leta.
• Urwego rwa kabiri: FRW 3,000 ku mwaka, hiyongereyeho FRW 1,000 yishyurwa na Leta.
• Urwego rwa gatatu: FRW 5,000 ku mwaka.
• Urwego rwa kane: FRW 8,000 ku mwaka.
• Urwego rwa gatanu: FRW 20,000 ku mwaka.

Mu ngingo y’iri teka, umunyamuryango yishyura kandi inyunganirabwishyu igihe cyose ahawe ubuvuzi. Iyi nyunganirabwishyu ni FRW 200 ku kigo nderabuzima cyangwa ivuriro ry’ibanze, naho ku bitaro ni 10% by’ikiguzi cy’ubuvuzi. Abatishoboye ntibatanga iyo nyunganirabwishyu.

Abayobozi b’Ibitaro na Minisiteri y’Ubuzima basobanura ko izi mpinduka zari zikenewe kuko:

• Ubukungu bw’igihugu burimo kuzamuka,
• Ibiciro ku masoko birazamuka,
• Serivisi nshya mu buvuzi zigiye kongerwa ku bakoresha ubwishingizi bwa Mituelle.

Izi mpinduka zizatangira gukurikizwa ku mwaka w’ubwisungane 2026-2027, guhera ku tariki 01 Nyakanga 2026.

Ikigo cy’Igihugu cy’Ubwiteganyirize (RSSB) gicunga Mituweli gitangaza ko hejuru ya 90% by’abanyamuryango bari mu byiciro byo gutanga umusanzu uri hagati ya FRW 4,000 na 8,000. Ibi bigaragaza ko impinduka zizafasha cyane mu kongera ubushobozi bw’abaturage no guha serivisi z’ubuvuzi ireme.

Ubuyobozi busaba ko abaturage basobanukirwa neza izi mpinduka, bakazikurikiza mu buryo bwuzuye kandi buhoraho. Bagaragaza ko umusanzu wiyongereye uzafasha mu gutanga serivisi z’ubuvuzi zinoze, kubungabunga ubuzima bw’abaturage no kongera ubushobozi bw’ibitaro mu Rwanda hose.

IMIHIGONEWS.RW