U Bwongereza Bukurikiranye Submarines z’u Burusiya Zateje Impungenge mu Nyanja

Ibikorwa by’ubutasi byo munsi y’inyanja bikomeje gukaza umwuka mubi hagati y’ibihugu bikomeye, mu gihe imiyoboro y’itumanaho n’ingufu ishyirwa mu kaga.

Mu nyanja ya Atlantique y’Amajyaruguru, mu gihe cy’ukwezi gushize, u Bwongereza bufatanyije n’ibihugu by’inshuti byakurikiranye submarine eshatu z’u Burusiya zirimo imwe y’intambara n’ebyiri z’ubutasi, zari zegereye amazi bugenzura mu bukungu (EEZ), mu gikorwa cyabayeho hagamijwe kumenya no gukumira icyahungabanya umutekano w’ibikorwa remezo byo munsi y’inyanja.

Aya makuru yatangajwe na Minisitiri w’Ingabo w’u Bwongereza, John Healey, agaragaza ko ibibazo by’umutekano mu nyanja bikomeje gufata indi ntera ku rwego mpuzamahanga. N’ubwo nta gitero cyabaye, ibikorwa by’izi submarines byateje impungenge zikomeye.

Amakuru dukesha Sky News avuga ko izi submarines zagaragaye mu gace ka Atlantique kegereye amazi u Bwongereza bugenzura mu bukungu, bikekwa ko zari mu butumwa bwo gukusanya amakuru ku miyoboro yo munsi y’inyanja.

Iyi miyoboro ifatiye runini ubuzima bwa buri munsi bw’ibihugu kuko inyuzwamo, hafi ya 95% by’itumanaho mpuzamahanga,igice kinini cy’ingufu zirimo gaz ikoreshwa mu Burayi

Mu rwego rwo gukaza umutekano, u Bwongereza bwohereje amato y’intambara, indege zidasanzwe ndetse n’ibikoresho byo mu mazi bigezweho mu gukurikirana izi submarines. Ibi byakozwe bufatanyije n’ibihugu by’inshuti hagamijwe kurinda ibikorwa remezo byo munsi y’inyanja.

Minisitiri John Healey yavuze ko iki gikorwa cyagaragaje ubushobozi bw’igihugu cye mu gukurikirana no kumenya ibikorwa bishobora guteza ibyago, anashimangira ko badashobora kwihanganira igikorwa cyose cyahungabanya umutekano.

Abasesenguzi mu bya gisirikare bagaragaza ko ibi bishobora kuba ari igice cy’igerageza ryo kureba intege nke z’ibikorwa remezo byo mu nyanja, cyane cyane mu gihe umubano w’ibihugu bikomeye ukomeje kuzamo ubushyamirane.
N’ubwo izi submarines z’u Burusiya zasubiye inyuma nta gikorwa cy’intambara zibashije gukora, iki kibazo cyasize impungenge ku mutekano w’inyanja n’ibikorwa remezo biyirimo. U Bwongereza n’ibihugu by’inshuti byemeje ko bizakomeza gukaza ingamba zo kurinda inyungu zabyo, mu gihe ipiganwa rya gisirikare rikomeje gufata indi ntera mu mazi y’isi.

IMIHIGONEWS.RW