SalamAir yatangije ingendo za Muscat–Kigali, u Rwanda rwitezweho kungukira mu bucuruzi, ubukerarugendo n’ishoramari

Ifungurwa ku ngendo oman-rwanda

Sosiyete y’indege ya SalamAir yo mu gihugu cya Oman yatangiye ku mugaragaro ingendo zihuza Umujyi wa Muscat na Kigali,n’ igikorwa gifatwa nk’intambwe ikomeye mu gukomeza umubano w’u Rwanda na Oman no koroshya ingendo hagati y’ibihugu byombi.

Indege ya mbere ya SalamAir yasesekaye ku Kibuga Mpuzamahanga cy’Indege cya Kigali kuri uyu wa 21 Nyakanga 2026, saa sita n’iminota 50 z’amanywa, yakirwa n’abayobozi batandukanye ndetse n’abafatanyabikorwa bo mu rwego rw’ubwikorezi bwo mu kirere.mu gihugu cya Omani.

Iki cyerekezo gishya cyatangirijwe ku Kibuga cy’Indege Mpuzamahanga cya Muscat mu muhango witabiriwe n’abayobozi ba SalamAir, Oman Airports, Ikigo gishinzwe ubwikorezi bwo mu kirere muri Oman, Ambasade y’u Rwanda muri Oman, abafatanyabikorwa bo mu bukerarugendo ndetse n’ibitangazamakuru mpuzamahanga.

Mu bari mu rugendo rwa mbere harimo n’intumwa zaturutse muri Oman zaje kwifatanya n’Abanyarwanda kwizihiza itangizwa ry’izi ngendo, zitezweho kurushaho gukomeza umubano hagati y’ibihugu byombi.

Ambasaderi w’u Rwanda muri Oman, CG Dan Munyuza, yavuze ko iki cyerekezo ari amateka mashya mu mubano w’ibihugu byombi, ashimangira ko kizafasha kongera ubuhahirane, ubukerarugendo ndetse n’ishoramari.

Yagaragaje kandi ko mu gihe RwandAir na yo yafata icyemezo cyo gutangira ingendo zerekeza muri Oman, izahabwa ubufasha bwose bukenewe kugira ngo ibikorwa bitangire mu buryo bwihuse.

Umuyobozi Mukuru wa SalamAir, Adrian Hamilton-Mans, yavuze ko Kigali ari isoko rifite amahirwe menshi, bityo gutangira izi ngendo bikaba biri mu rwego rwo kwagurira ibikorwa by’iyi sosiyete ku masoko mashya.

Yasobanuye ko izi ngendo zizafasha guteza imbere ubukerarugendo, ubucuruzi no koroshya urujya n’uruza rw’abagenzi hagati ya Afurika n’Uburasirazuba bwo Hagati.

SalamAir yatangaje ko izajya ikora ingendo ebyiri mu cyumweru, buri wa Mbere no ku wa Kane, hagati ya Muscat na Kigali, ibintu bizafasha abagenzi kubona uburyo bworoshye kandi buhendutse bwo kugenda.

Ku ruhande rw’u Rwanda, Umunyamabanga wa Leta muri Minisiteri y’Ibikorwaremezo, Col Claudien Bizimungu, yavuze ko kongera indege zikorera mu Rwanda biri mu ngamba za Guverinoma zigamije guteza imbere ubukungu no gukomeza gushyira igihugu ku ikarita y’ubwikorezi bwo mu kirere.

Yagaragaje ko izi ngendo zizorohereza cyane Abanyarwanda bajyaga guhaha muri Dubai, muri Aziya cyangwa mu Burayi banyuze mu zindi nzira ndende kandi zihenze, bityo bakazajya bagera aho bajya mu gihe gito kandi ku giciro kiri hasi.

Abagenzi bazakoresha SalamAir bazanashobora gukomeza ingendo zabo berekeza mu bindi bihugu byo mu Burasirazuba bwo Hagati, Aziya, Afurika ndetse n’u Burayi, binyuze ku muyoboro wa Muscat.

Abasesenguzi mu rwego rw’ubwikorezi bavuga ko gutangizwa kw’izi ngendo bishobora kongera umubare w’abakerarugendo basura u Rwanda, gukurura abashoramari baturuka muri Oman no mu karere k’Uburasirazuba bwo Hagati, ndetse bikongera amahirwe y’ubucuruzi hagati y’impande zombi.

Ni indi ntambwe igaragaza ko u Rwanda rukomeje kwagura imikoranire n’ibindi bihugu, ruteza imbere ubwikorezi bwo mu kirere nk’inkingi y’iterambere ry’ubukungu n’ishoramari.

WWW.IMIHIGONEWS.RW