Kigali: Abaturage ba Kicukiro biyubakiye imihanda ine ya kaburimbo ifite agaciro ka miliyoni 203 Frw

Imihanda igezweho, yubatswe n’abaturage ubwabo, ifite kilometero 1,5, igamije koroshya ingendo no kongera agaciro k’ubutaka mu Murenge wa Kagarama, Umudugudu wa Kanserege akarere ka Kicukiro.

Abaturage bo mu Karere ka Kicukiro, Umurenge wa Kagarama, Akagari ka Kanserege mu Mudugudu wa Kanserege, biyubakiye imihanda ine ya kaburimbo ifite agaciro ka miliyoni 203 Frw, ifite uburebure bwa kilometero 1,5, mu rwego rwo guteza imbere imibereho myiza no koroshya ingendo.

Umuhango wo gutaha iyi mihanda wabaye ku wa 21 Ukuboza 2025, witabirwa n’abayobozi batandukanye barimo Umuyobozi Nshingwabikorwa w’Akarere ka Kicukiro, Mutsinzi Antoine. Imirimo yo kubaka iyi mihanda yatangiye muri Gicurasi 2025, isozwa muri Nzeri 2025, ikurikiranwe na komite igizwe n’abantu 12 yashyizweho n’ubuyobozi bw’Umudugudu wa Kanserege.

Igitekerezo cyo kubaka iyi mihanda cyaje mu rwego rw’ishyirwa mu bikorwa ry’ingamba z’Umujyi wa Kigali zo kubaka imihanda y’imigenderano. Nubwo 70% y’amafaranga y’ishoramari ryari gutangwa n’Umujyi na 30% n’abaturage, biyemeje kwiyubakira 100% bitewe n’ubwinshi bw’imihanda ikenewe.

Perezida wa Komite y’abaturage, Tuyisabe Léopold, yashimiye abaturage ku bwitange bagize, anashimira ubuyobozi bwabahaye ubufasha aho bwari bukenewe. Yagize ati:

“Ibyatugoye birimo kumvisha abaturage, basobanurirwa imiterere y’igikorwa, guhigura ibyo biyemeje ndetse no gukurikirana imikorere ya rwiyemezamirimo, ariko turashima ubwitange bagize kandi n’ubuyobozi bwacu bwatubaye hafi aho twabakeneraga twarababonaga.”

Umuyobozi w’Umudugudu wa Kanserege, Niyonsaba Isaac, yavuze ko imihanda igezweho yahinduye byinshi mu mibereho y’abaturage ndetse byongereye agaciro k’ubutaka. Ati:

“Imihanda igezweho ihindura byinshi cyane nko mu mijyi, bituma imibereho y’umuturage iba myiza, bikoroshya ingendo kandi nk’ushaka kugurisha cyangwa gukodesha, agaciro k’inzu ye kariyongera.”

Umuyobozi Nshingwabikorwa w’Akarere ka Kicukiro, Mutsinzi Antoine, yashimye abaturage ku bw’igisubizo bwabo, anemeza ubufatanye mu gukemura ibitaranozwa. Yagize ati:

“Nyuma yo kureba ubwitange mwagize kugira ngo bishyirwe mu bikorwa ndabashimye kandi nanjye nk’umuyobozi hari byinshi nahigiye bizadufasha gutera imbere. Ku bigendanye na ruhurura, twemeye kubikemura byihuse ndetse nk’abaturage biyubakiye 100% dufite gahunda yo kubunganira, iyo mihanda igashyirwaho amatara.”

Mu baturage 98 bitanze kuri iki gikorwa, buri wese yatanze 2.050.000 Frw, ndetse bamwe batanga n’inyongera. Si ubwa mbere abatuye aka Karere bishakamo ibisubizo; mu Murenge wa Nyarugunga nabo bari barakusanyije miliyoni zisaga 700 Frw mu mwaka w’ingengo y’imari wa 2024/2025 kubaka ibikorwaremezo birimo n’imihanda.

Uyu mushinga w’imihanda werekanye ubwitange n’ubufatanye bw’abaturage mu guteza imbere imibereho myiza no koroshya ingendo. Igaragaza ko ubufatanye hagati y’abaturage n’ubuyobozi bushobora gutanga ibisubizo birambye ku bibazo by’ibikorwaremezo, kandi ko kwishakamo ibisubizo ari inzira y’ingenzi yo guteza imbere imibereho n’agaciro k’ubutaka mu karere.

 

IMIHIGO NEWS

CC: Igihe