Burundi: Dr Alain Ndikumana ashinja abaminisitiri kunyereza umutungo wa Leta

Minisitiri w’Imari n’Igenamigambi mu Burundi Dr Alain Ndikumana

Avuga ko hari amasezerano ya miliyari 18 z’amafaranga y’u Burundi yasinywe mu buryo bunyuranyije n’amategeko, akanenga uburangare bwateje ikibazo gikomeye cy’ibura ry’ifumbire mu gihugu.

Minisitiri w’Imari n’Igenamigambi mu Burundi, Dr Alain Ndikumana, ku wa 25 Ukuboza 2025, yatangaje ko atazaceceka ku bayobozi bamwe bashaka ko igihugu kiguma mu bukene binyuze mu kunyereza imitungo ya Leta, ashinja by’umwihariko Minisitiri w’Ibidukikije, Ubuhinzi n’Ubworozi, Madamu Carine (Kariniya) Barushimana, kuba yarasinye amasezerano atanyuze mu mategeko, ibintu avuga ko byagize ingaruka zikomeye ku micungire y’imari ya Leta no ku kibazo cy’ifumbire mu gihugu.

Aya magambo Dr Ndikumana yayavuze mu mvugo ikakaye, agaragaza impungenge ku miyoborere y’inzego zimwe za Leta, mu gihe u Burundi buyobowe na Perezida Gen. Évariste Ndayishimiye. Yavuze ko nubwo ubuyobozi bukuru bw’igihugu bufite icyerekezo cyiza, hari abayobozi bamwe batubahiriza inshingano zabo, bigatuma iterambere ry’igihugu rishyirwa mu kaga.

Dr Ndikumana yavuze ko Minisitiri w’Ibidukikije, Ubuhinzi n’Ubworozi, Madamu Carine Barushimana, akimara kurahira mu nshingano ze, yahise asinyisha amasezerano angana na miliyari 18 z’amafaranga y’u Burundi, atanyuze mu nzira zemewe n’amategeko agenga imari ya Leta.

Yagize ati:“Ni gute Minisitiri w’Imari atasinye kuri ayo masezerano? Izo nyandiko zose zasinywe zidakurikije amategeko ya Leta.”
Yongeyeho ko bene ayo masezerano ashyira mu kaga umutungo wa Leta kandi agahungabanya amahame y’imiyoborere myiza igihugu cyiyemeje gukurikiza.

Minisitiri Ndikumana yagarutse ku kibazo gikomeye cy’ibura ry’ifumbire mu gihugu, avuga ko cyatewe n’imicungire mibi n’uburangare bw’inzego zishinzwe ubuhinzi.

Yasobanuye ko: Ifumbire itatanzwe ku gihe cyari cyateganyijwe,Hari ifumbire yagombaga gutangwa ku buntu n’iyagombaga kugurishwa ku giciro cyagenwe na Leta ariko ntibikurikizwe,Nta muyobozi wo ku rwego rwa minisiteri wigeze ajya kugenzura ikibazo cy’iri bura.

Yavuze ko ibi byagize ingaruka zikomeye ku musaruro w’abahinzi, bityo bikabangamira ubukungu bw’igihugu muri rusange.

Dr Ndikumana yagaragaje ko ikibazo atari Perezida w’igihugu, ahubwo ari bamwe mu bayobozi bamukikije.

Yagize ati:“Ubutegetsi ni bwiza, ariko hari abayobozi batabukwiriye.”

Yongeye kubaza niba bikwiye ko abayobozi babona ibi byose bigakorwa mu gihugu bagahitamo guceceka, ashimangira ko we adateze kwemera gukomeza kurebera akarengane n’iyangirika ry’umutungo wa Leta.

Ibi byatangajwe na Minisitiri w’Imari Dr Alain Ndikumana byerekana ko mu buyobozi bw’u Burundi hari impungenge zikomeye ku micungire y’imari ya Leta no ku miyoborere y’inzego zimwe z’igihugu, cyane cyane mu bijyanye n’ubuhinzi.

Abasesenguzi bavuga ko aya magambo ashobora gutuma: Hatangizwa iperereza ryimbitse ku masezerano ya miliyari 18 yavuzwe,Hashyirwaho ingamba nshya zo kugenzura imicungire y’imari ya Leta,Cyangwa hakabaho impinduka mu buyobozi bw’inzego zimwe.

Bamwe mu bakurikirana ibya Leta banavuga ko hari raporo zigaragaza ko ibigori bibikwa mu bigega bya Leta nyamara mu by’ukuri ntabihari, ibintu bikomeje kongera impungenge ku mucyo n’ubunyangamugayo mu micungire y’umutungo w’igihugu.

 

IMIHIGO NEWS