NGOMA: Umugabo afungiye kuri RIB ya Kibungo akurikiranyweho kuroga umugore we akoresheje supaguru yashyize muri supadipe

Umugabo witwa Hakuzumuremyi François, w’imyaka 34, wo mu Karere ka Ngoma, afungiye kuri Sitasiyo y’Urwego rw’Igihugu rw’Ubugenzacyaha (RIB) ya Kibungo, akurikiranyweho icyaha cyo kugerageza kwica umugore we, Ntimugura Gloriose w’imyaka 33, amuroze supaguru yari yashyize muri supadipe, mu gitondo cyo ku wa Gatandatu tariki ya 20 Ukuboza 2025.

Ibi byabereye mu Mudugudu wa Munini, mu Kagari ka Rugese, Umurenge wa Rurenge, mu Karere ka Ngoma, mu Ntara y’Iburasirazuba, aho amakuru aturuka mu buyobozi n’uwahohotewe agaragaza ko uyu muryango wari umaze igihe uri mu makimbirane akomeye ashingiye ku bibazo by’Abashakanye.

Amakuru IMIHIGO NEWS yahawe avuga ko Hakuzumuremyi François na Ntimugura Gloriose bashakanye mu buryo bwemewe n’amategeko, ariko nyuma umugabo aza gushaka undi mugore, ibintu byakomeje guteza umwuka mubi mu muryango.

Ntimugura Gloriose avuga ko umugabo we yashatse kumwica akoresheje supaguru, umuti uzwi cyane ukoreshwa n’abakora inkweto, awushyira muri supadipe yari amuguriye.

Yagize ati:“Yaje mu rugo avuye ku mugore yashatse ahandi, ambwira ko ashaka kungurira ikinyobwa. Mubwira ko ntabinywa, ambaza icyo yangurira, mubwira ko yangurire supadipe. Yayiguze ayishyira mu bikombe. Ngarutse mvuye mu gikoni, ambwira ngo nywe. Nshyize ku munwa n’umva supaguru imfashe ku munwa, iminwa igiye gufatana mpita ndeka kubinywa.”

Yakomeje avuga ko nyuma yo kubona ko atanyoye, umugabo yahise asohoka amukingirana, agaruka mu gitondo aje kureba niba yapfuye, ari nabwo abayobozi bafashe uwo mugabo.

Uyu mubyeyi avuga ko amaze imyaka 12 abana n’uyu mugabo, ariko ko amakimbirane yiyongereye cyane nyuma yo kubyara abana b’impanga, aho umugabo yamusize ajya gushaka undi mugore. Yongeyeho ko hari igihe umugabo yigeze gufatirwa mu cyuho ajyana n’uwo mugore mushya mu rugo rwe, ariko nyuma akaza kurekurwa.

Ntimugura kandi avuga ko kunywa iyo supadipe byamugizeho ingaruka ku buzima, birimo kuruka cyane no kuribwa mu nda, ariko ko yaburiye ubushobozi bwo kwivuza uko bikwiye nubwo yari yoherejwe ku Bitaro bya Kibungo.

Umuyobozi w’Umudugudu wa Munini yavuze ko uyu muryango umaze igihe uri mu makimbirane akomeye, anavuga ko umugabo yigeze gutangaza ko aho gutandukana n’umugore we azabyikemurira, ibintu byari biteye impungenge.

Umunyamabanga Nshingwabikorwa w’Akagari ka Rugese, Baziki Denis, yemeje aya makuru, avuga ko uyu mugabo yamaze gushyikirizwa RIB ya Kibungo, naho umugore agirwa inama yo kwivuza.

Iki kibazo cyongeye kugaragaza uburemere bw’amakimbirane mu miryango nyarwanda, ikibazo kimaze gufata indi ntera, aho raporo zitandukanye zigaragaza ko mu myaka ishize amakimbirane mu muryango yarenze 50% by’imiryango, bigatera ihohoterwa rikabije n’impfu.

Inzego zishinzwe umutekano n’imibereho myiza y’abaturage zikomeje gushishikariza imiryango gushaka ibisubizo binyuze mu mategeko n’inzego zibifitiye ububasha, kwirinda kwiha ubutabera no guhitamo inzira zishobora guteza ingaruka zikomeye ku buzima bw’abantu.

IMIHIGO NEWS