Ngoma: Visi Meya arasaba abayobora amakoperative kurangwa n’imiyoborere myiza.

Umusaruro w'ibihigwa by'imyumbati. cc: realrwanda.rw/ (photo)

Visi Meya w’Akarere ka Ngoma ushinzwe iterambere ry’ubukungu, Bwana Mapambano N. Cyriaque, yibukije abayobora amakoperative ko bagomba gushyira imbere inyungu rusange z’abanyamuryango aho kwishakira inyungu zabo bwite. Yabigarutseho mu kwizihiza Umunsi Mpuzamahanga w’Amakoperative wabereye mu Murenge wa Zaza ku rwego rw’akarere, aho hatanzwe ubutumwa bugamije kunoza imikorere n’imiyoborere y’izi nzego z’ubufatanye mu bukungu.

Mu Karere ka Ngoma, abayobozi n’abanyamuryango ba koperative zitandukanye bahuriye ku Murenge wa Zaza ku wa Gatanu tariki ya 5 Ukuboza 2025, mu kwizihiza Umunsi Mpuzamahanga w’Amakoperative. Ni umuhango waranzwe n’ubutumwa butandukanye bwibanda ku gukomeza kubaka amakoperative akomeye kandi abereye abanyamuryango bayo.

Mu butumwa yagejeje ku bitabiriye ibi birori, Visi Meya w’Akarere ka Ngoma ushinzwe iterambere ry’ubukungu, Mapambano N. Cyriaque, yagarutse ku bibazo bikigaragara muri zimwe mu makoperative, birimo abayobozi bishyira imbere inyungu zabo bwite aho gushyira imbere iz’abanyamuryango. Avuga ko iyo myitwarire ibangamira iterambere ry’amakoperative n’abanyamuryango bayo, kandi igahabanya icyizere cy'ubuyobozi.

Yagize ati: “Hari abajya imbere mu buyobozi bwa koperative bagamije kwibonera inyungu zabo bwite. Ugasanga ntibaha agaciro ibitekerezo n’uburenganzira bw’abanyamuryango. Iyo ugaragaye muri iyo myitwarire uba wica itegeko, kandi uwica itegeko abihanirwa.”

Cooperative y'Abamotari mu karere ka ngoma (Zaza)

Yakomeje asobanura ko koperative igomba kuba “umusemburo w’iterambere” mu gihe iyobowe neza. Yashimangiye ko kugira ngo ibyo bigerweho, hakenewe imiyoborere ishingiye ku mucyo, kugaragaza aho umutungo ukoreshejwe, no kubahiriza amategeko igihugu cyashyizeho agenga amakoperative.

Ati: “Ntabwo bikwiye ko umuntu abyuka mu gitondo ngo ahite yiyita ko yashinze koperative. Hari amategeko agenga izi nzego kandi agomba kubahirizwa. Ubuyobozi bwiza si amagambo, ni ibikorwa bigaragarira abanyamuryango.”

Abanyamuryango bavuga ko koperative zabakuye mu bukene

Mu bandi bagaragaje ibyishimo, harimo Mukamana Venancia, umwe mu banyamuryango ba koperative y’abahinzi b’umuceri CORIMI (Coopérative Riziculteurs de Mirenge). Avuga ko amaze kugera ku bintu byinshi kubera kuba muri koperative, birimo kwiyubakira ubushobozi mu buhinzi bw’umuceri ndetse no gutera intambwe mu mibereho ye.

Yagize ati:“Mu minsi ya mbere bamwe batumvaga uko guterera umuceri ku murongo byari ngombwa. Goronome yatubwiye ati ‘mutere umuceri ku murongo’, bamwe batangira kubyanga. Ariko ababyumvise neza babonye impinduka. Aho twakuraga ibiro ijana ku murima, ubu turarenza 300, nabwo ukumva utunganiye. Umuceri wacu uradufasha mu biribwa ndetse n’ubukungu bwacu burazamuka.”

Mukamana akomeza avuga ko amafaranga akura muri koperative yamufashije kwita ku muryango we no kwishyurira abana ishuri. Ati:“Nabashije kwishyurira abana amashuri ntahungabanye, mbese ubuzima bwanjye burimo gutera imbere kubera koperative. Uwo musaruro watumye mva mu rwikekwe.”

Akarere karasaba ko umucyo uba ishingiro ry’amakoperative

Visi Meya Mapambano yasabye ko imiyoborere myiza iba umusingi w’amakoperative yose akorera muri Ngoma, cyane cyane muri iki gihe akarere gafite gahunda yo kongera umusaruro w’umuceri.

Yagize ati:“Turashishikariza amakoperative gukomeza gukorera mu mucyo, kwirinda kunyereza umutungo wa rubanda, no gushyira imbere inyungu rusange. Hari aho twagiye tubona amakoperative akungukira abayobozi kurusha abo bagenewe kuyafashisha. Ibyo tugomba kubirwanya.”

Yakomeje avuga ko gutanga umusaruro no kurengera inyungu z’abanyamuryango bidashobora kugerwaho mu gihe hari abayobozi bihangira amategeko cyangwa bakarenga ku nshingano zabo.

Ati:“Korera mu mucyo ibyo amategeko akugenera nabyo birahari. Si byiza kwiruka inyuma y’inyungu udafitiye uburenganzira. Icy’ingenzi ni ugukorera mu nyungu za koperative n’abanyamuryango bayo.”

Akarere kiyemeje kongera ubuso buhingwaho umuceri,Mu rwego rwo kuzamura umusaruro w’umuceri mu Karere ka Ngoma, ubuyobozi bwatangaje ko hari gahunda yo gutunganya ibishanga bingana na hegitari 200, bizahingwamo umuceri mu gihe cya vuba. Ni icyemezo gifatwa nyuma yo kubona ko ubuhinzi bw’umuceri bukomeje kugira uruhare rukomeye mu bukungu bw’akarere no kongera ubushobozi bw’abaturage.

Ibi bishanga bishya biteganyijwe bizafasha kongera umusaruro, kugabanya ikibazo cy’ibura ry’umuceri mu bice bimwe, ndetse no kongera ibicuruzwa byoherezwa ku isoko.

Koperative CORIMI yishyuye Ejo Heza abanyamuryango 1180,Muri ibi birori kandi, koperative CORIMI yashyikirije ubuyobozi bw’Akarere ibyemezo byo kwishyurira abanyamuryango 1,180 umusanzu wa Ejo Heza, gahunda igamije gutuma abaturage bazagira amafaranga azabafasha mu zabukuru.

Ni igikorwa cyashimwe n’ubuyobozi bw’akarere, kivuga ko ari ikimenyetso cy’imiyoborere myiza n’ubutwari bwo kwita ku mibereho y’abanyamuryango, cyane cyane abakuze.

Visi Meya Mapambano yagize ati:“Iki gikorwa cya Ejo Heza kirerekana ko muri CORIMI hari imiyoborere ishyira imbere inyungu z’abanyamuryango. Ibi turabishima kandi dusaba ko n’izindi koperative zabigira umuco.”

Abanyamuryango barasabwa kugira uruhare mu miyoborere,Uretse ubutumwa bugenewe abayobozi, ubuyobozi bw’akarere bwasabye n’abanyamuryango gutanga umusanzu mu miyoborere ya koperative zabo, harimo kujya bitabira inama, gukurikirana imikoreshereze y’umutungo no gutanga ibitekerezo byubaka.

Bagasabwa kandi kwirinda kwituramira igihe babonye amakosa cyangwa imyitwarire idahwitse mu buyobozi.

Ibyagarutsweho mu kwizihiza Umunsi Mpuzamahanga w’Amakoperative mu Karere ka Ngoma bigaragaza ishusho y’uko iyi nzego ifite uruhare runini mu iterambere ry’abaturage no mu bukungu bw’akarere. Ubuyobozi bugaragaza ko iterambere ry’amakoperative ritagerwaho hatabayeho imiyoborere myiza, umurongo uhamye muri gahunda zo kongera umusaruro cyane cyane mu buhinzi bw’umuceri.

Gahunda nshya yo gutunganya ibishanga 200 ha, ukwiyongera kw’amakoperative yishyurira abanyamuryango Ejo Heza ndetse n’ubuhamya bw’abahinzi bagenda batera imbere, byose byerekana ko koperative muri Ngoma ziri mu rugendo rwo kwiyubaka no kurushaho kuba umusemburo w’iterambere rirambye.

 cc: realrwanda.rw