HANZE: Ubushinwa bwakajije imyitozo ya gisirikare ikikije Taiwan, indege zirahagarara, impungenge ziriyongera

Imyitozo ya “Justice Mission 2025” irimo kurasa bya nyabyo yakajije umwuka mubi mu gace ka Taiwan Strait, igira ingaruka ku ndege, uburobyi n’umutekano w’akarere.

Ingabo z’Ubushinwa (PLA) zakomeje umunsi wa kabiri w’imyitozo ya gisirikare ikikije Taiwan, zirimo kurasa bya nyabyo mu nyanja no mu kirere, mu byo Beijing yise “Justice Mission 2025”, igamije kuburira Taiwan n’abayishyigikiye ko ishobora kuyifatira ingamba za gisirikare, ibintu byatumye indege zisaga 100 zihagarara cyangwa zisubikirwa ingendo.

Iyi myitozo ya gisirikare yabereye mu majyaruguru no mu majyepfo ya Taiwan yongeye kuzamura umwuka w’intugunda mu karere ka Asia-Pacific, aho Ubushinwa bukomeje gushimangira ko Taiwan ari igice cy’ubutaka bwabwo, mu gihe Taiwan yo ikomeje kwiyobora yigenga kuva mu 1949.

 Amakuru dukesha abc news avuga ko, Ingabo z’Ubushinwa binyuze mu buyobozi bwa Eastern Theater Command, zohereje mu nyanja no mu kirere amato ya gisirikare, indege z’intambara n’ibisasu biremereye, hagamijwe gupima ubushobozi bwo guhuza igisirikare cyo mu kirere n’icyo mu mazi, ndetse no kugota Taiwan mu gihe hab habaye intambara.

Umuvugizi w’izi ngabo, Li Xi, yavuze ko imyitozo yageze ku “musaruro wifuzwa”, ashimangira ko ari ubutumwa bukomeye bwo kuburira“ ingabo zose zishaka gutandukanya Taiwan n’Ubushinwa”.

Ku ruhande rwa Taiwan, Minisiteri y’Ingabo yatangaje ko hagati ya saa kumi n’ebyiri za mu gitondo zo ku wa mbere na saa kumi n’ebyiri zo ku wa Kabiri ku wa 29 na 30 Ukuboza 2025, habonetse indege 130 z’Ubushinwa, harimo iz’intambara n’izitwara ibisasu, amato ya gisirikare 14 n’andi 8 ya leta, aho 90 muri izo ndege zarenze umurongo wo hagati (median line) w’inyanja ya Taiwan Strait.

Ibi byagize ingaruka ku buzima bwa buri munsi, aho Ikigo gishinzwe iby’indege muri Taiwan cyatangaje ko hari utuce 7 twashyizwe mu byago, bigatuma indege zirenga 100 zisubikwa, zihindura amasaha cyangwa zihagarikwa burundu.

Perezida wa Taiwan, Lai Ching-te, yavuze ko igihugu cye kitazongera umwuka mubi, ariko anenga Ubushinwa avuga ko “imyitwarire yabwo idakwiriye igihugu gikomeye gifite inshingano mpuzamahanga.”

Minisitiri w’Ingabo wa Taiwan, Wellington Koo, yavuze ko iyi myitozo ihungabanya umutekano w’akarere, igateza ibyago ku bwikorezi bwo mu nyanja, ubucuruzi n’ingendo zo mu kirere.

Mu rwego mpuzamahanga, Leta Zunze Ubumwe za Amerika zatangaje ko zitamenyeshejwe iyi myitozo mbere, ariko Perezida Donald Trump yavuze ko adahangayitse cyane, ashimangira ko afitanye umubano mwiza n’Umushinwa Xi Jinping.

Abasesenguzi bavuga ko iyi myitozo ishobora gukomeza kongera igitutu ku mutekano wa Asia-Pacific, cyane cyane mu gihe Ubushinwa bukomeje kwerekana ko bwiteguye gukoresha ingufu mu gukemura ikibazo cya Taiwan, ibintu bishobora kugira ingaruka ku bukungu, umutekano n’imibanire mpuzamahanga mu minsi iri imbere.

IMIHIGO NEWS | With in the best News