Urukiko Rwisumbuye rwa Muhanga rwasubitse isomwa ry’urubanza rwa Me Kanani Boniface ushinjwa icyaha cyo gusambanya umwana

Urukiko Rwisumbuye rwa Muhanga rwatangaje isubikwa ry’isomwa ry’urubanza ruregwamo umunyamategeko Me Kanani Boniface, ukekwaho icyaha cyo gusambanya umwana w’imyaka 15 y’amavuko, nyuma y’uko imyanzuro y’urubanza itari yarangiza gutunganywa kubera akazi kenshi kari gafitwe n’abagize Inteko iburanisha.

Kuri uyu wa Gatatu tariki ya 17 Ukuboza 2025, saa munani zuzuye, ni bwo byari biteganyijwe ko Urukiko Rwisumbuye rwa Muhanga rusoma umwanzuro w’urubanza rwakurikiwe n’abantu benshi bitewe n’uburemere bw’ibirego birimo. Abari bitabiriye barimo abanyamategeko, abanyamakuru, abavandimwe b’impande zombi ndetse n’abaturage bashishikajwe no kumenya icyerekezo cy’uru rubanza.

Gusa isomwa ry’urubanza ntiryabaye nk’uko byari byitezwe, kuko abari bateraniye ku rukiko bakomeje gutegereza igihe kirenga isaha imwe, kugeza saa cyenda zirenga, Inteko iburanisha itaragaragara.

Nk’uko Imihigo News yabitangarijwe n’amasoko yizewe afitanye isano n’ubutabera, isubikwa ry’iri somwa ryatewe n’uko imyanzuro y’urubanza itaraba yuzuye ku mpamvu zishingiye ku kazi kenshi abacamanza bari bafite muri icyo gihe. Byabaye ngombwa ko uru rubanza rwimurirwa ku tariki ya 30 Ukuboza 2025, ari bwo hateganyijwe isomwa ry’umwanzuro, keretse habaye impinduka.

Uru rubanza rwa Me Kanani Boniface rwabaye rumwe mu manza zavuzwe cyane mu gihugu bitewe n’imiterere y’icyaha ashinjwa ndetse n’uko yaburanye kuva rwatangira. Mu byaranze uru rubanza harimo impaka ndende zishingiye ku buryo iburanisha rigomba gukorwa.

Ubushinjacyaha bwari bwasabye ko uru rubanza ruburanishwa mu muhezo, hashingiwe ku mategeko arengera abana, buvuga ko urega yari umwana mu gihe ibyaha bivugwa byabaga. Ubushinjacyaha bwagaragaje ko kuburanisha uru rubanza mu ruhame byashoboraga guhungabanya imibereho n’uburenganzira bw’uregwa, ari we mwana.

Ku rundi ruhande, abunganizi ba Me Kanani Boniface mu mategeko bagaragaje ko bifuza ko iburanisha rikorwa mu ruhame, bavuga ko ari bwo abaturage n’itangazamakuru byabona neza ukuri kw’ibiri kuvugwa, bityo bikarinda umukiliya wabo gushinjwa ibyaha atakoze.

Izo mpaka zafashe igihe kirekire mu byumweru by’iburanisha, aho Inteko iburanisha yagendaga isuzuma impamvu z’impande zombi. Gusa urukiko rwaje gufata icyemezo cyo kuburanisha uru rubanza mu muhezo, rushingiye ku ngingo z’amategeko zishyira imbere kurengera umwana, cyane cyane mu manza zijyanye n’ihohoterwa rishingiye ku gitsina.

Nubwo uru rukiko rwafashe uwo mwanzuro, abunganizi ba Me Kanani bakomeje kugaragaza ko batemeranya n’icyo cyemezo, bavuga ko urega amaze kugera ku myaka y’ubukure, bityo ko urukiko rwari rukwiye guha agaciro ibisobanuro byabo no kwemera ko urubanza rubera mu ruhame.

Kugeza ubu, Imihigo News yamenye amakuru aturuka ku ruhande rw’uregwa, aho yatangaje ko afite ibimenyetso bifatika bigaragaza ko Me Kanani Boniface yamusambanyaga mu gihe yari akiri umwana. Yavuze ko ibyo bimenyetso byashyikirijwe Ubushinjacyaha kandi ko yizeye ko ubutabera buzabikurikirana mu mucyo.

Ku rundi ruhande, amakuru Imihigo News ifite agaragaza ko Me Kanani Boniface ahakana yivuye inyuma ibyaha ashinjwa, akemeza ko nta shingiro bifite. Yagaragaje ko yizeye urukiko n’ubutabera bw’u Rwanda, avuga ko azagaragaza ukuri kwe mu byemezo bizafatwa.

Me Kanani Boniface ari kunganirwa n’abanyamategeko batatu, mu gihe urega we afite umwavoka umwe ndetse n’Ubushinjacyaha buhagarariye inyungu rusange n’ubutabera bw’igihugu. Ibi bigaragaza ko uru rubanza rufite uburemere n’inyungu rusange, bituma rukurikirwa n’abantu benshi.

Isubikwa ry’isomwa ry’urubanza rwa Me Kanani Boniface ryongeye kugaragaza ko inzira y’ubutabera ishobora gufata igihe, cyane cyane mu manza zifite uburemere n’ingaruka ku mibereho y’abantu benshi. Mu gihe hategerejwe tariki ya 30 Ukuboza 2025, amaso ya benshi aracyahanze ku myanzuro izafatwa n’Urukiko Rwisumbuye rwa Muhanga, mu rubanza rugarukwaho cyane kandi rufite igisobanuro gikomeye ku burenganzira bw’abana n’ihame ry’ubutabera busesuye

 

IMIHIGO NEWS | Imihigonews.rw