Gatsibo: GS NTETE yatangije ku mugaragaro ubukangurambaga bwa FresheriKuIshuri mu kwimakaza isuku n’isukura (Amafoto)

Ubuyobozi b’ishuri, abarimu n’abanyeshuri basabwe gufata isuku nk’umuco uhoraho mu myigire no mu mibereho ya buri munsi.

Ku wa mbere tariki ya 12 Mutarama 2026 ikigo cy’amashuri cya GS NTETE, giherereye mu Murenge wa Kiramuruzi mu Karere ka Gatsibo cyatangije ku mugaragaro ubukangurambaga bw’isuku bwiswe FresheriKuIshuri, bugamije kwimakaza isuku n’isukura ihoraho mu mashuri. Iki gikorwa cyitabiriwe n’ubuyobozi bw’ishuri, abarimu n’abanyeshuri, hagamijwe gushyira mu bikorwa gahunda ya Minisiteri y’Uburezi (MINEDUC) mu rwego rwo guteza imbere ubuzima bwiza n’ireme ry’uburezi.

Nk’uko biri gukorwa mu mashuri atandukanye hirya no hino mu gihugu, aho Urwego rw’Igihugu rushinzwe Uburezi bw’Ibanze (REB) rufatanyije n’inzego z’ibanze mu gutangiza ubu bukangurambaga na GS NTETE yinjiye muri gahunda ya FresheriKuIshuri. Iyi gahunda ije gukangurira amashuri gufata isuku n’isukura nk’igikorwa cya buri munsi aho kubifata nk’ibikorwa bikorwa rimwe na rimwe, hagamijwe kubaka abanyeshuri bafite imyitwarire , imyitwarire myiza n’indangagaciro zikwiye.

Mu ijambo ryatanzwe n’Umuyobozi w’ishuri rya GS NTETE, Bwana UKOBIZABA Emmanuel yibukije abanyeshuri ko gahunda ya FresheriKuIshuri itarangirira ku ishuri gusa, ahubwo igomba kubaranga aho bazajya hose. Yabasabye gukomeza isuku y’umubiri, imyambaro aho bigira n’aho babana n’abandi kuva igihembwe gitangiye kugeza gisoje ndetse no mu buzima busanzwe bwo hanze y’ishuri.

Umuyobozi wungirije ushinzwe amasomo, Mediatrice MUKAMANZI nawe yashimangiye ko isuku n’isukura bifite uruhare rukomeye mu myigire myiza asaba abarimu gukomeza kuba icyitegererezo mu gushyira mu bikorwa iyi gahunda no kuyigisha abanyeshuri mu buzima bwa buri munsi.

Inyigisho ku ntego n’ibikubiye muri FresheriKuIshuri

Iki kiganiro cyatanzwe n’umwarimu wigisha muri GS NTETE, Bwana MUSIGIRENDE Fulgence wasobanuriye abanyeshuri n’abandi bitabiriye intego n’inyigisho zigize ubukangurambaga bwa FresheriKuIshuri.

Yibukije ko isuku n’isukura ari inkingi y’ingenzi mu mibereho myiza n’ireme ry’uburezi, asobanura ko ubu bukangurambaga bugamije guhindura imyumvire no kwimakaza umuco w’isuku nk’igikorwa gihoraho. Yagarutse ku ngeso zoroshye ariko z’ingenzi zirimo gukaraba intoki n’amazi meza n’isabune, gukoresha neza ubwiherero isuku yo mu kanwa gutunganya aho twigira n’aho dutekera, ndetse no gushyira imyanda hatandukanywa iyabora n’itabora.

Ibyitezwe ku banyeshuri n’ishuri muri rusange,
Abitabiriye iki gikorwa basobanuriwe ko, binyuze muri FresheriKuIshuri hitezwe ko ishuri rizagira gahunda ihoraho y’isuku, ibyumba by’amashuri, ubwiherero, aho gukarabira intoki n’ibindi bikorwaremezo bikazahora bisukuye kandi bikoreshwa neza.

Abanyeshuri basabwe gufata isuku y’umubiri, imyambaro isukuye, inkweto zisukuye, inzara zikatishijwe n’isuku yo mu kanwa nk’inshingano zabo za buri munsi, mu gihe abarimu n’abayobozi basabwa gukomeza kuba icyitegererezo no gukurikirana ishyirwa mu bikorwa ry’iyi gahunda.

Itangizwa ry’ubukangurambaga FresheriKuIshuri kuri GS NTETE ni intambwe ikomeye mu gushyira mu bikorwa gahunda ya Leta yo kwimakaza isuku n’isukura mu mashuri yose y’igihugu. Ubuyobozi bw’ishuri bwagaragaje icyizere ko, binyuze mu bufatanye bw’abarimu n’abanyeshuri, isuku izahinduka umuco uhoraho uzabafasha kugira ubuzima bwiza, gutsinda neza no kuba abaturage b’ejo hazaza bafite imyatwarire myiza n’indangagaciro. Ishuri risukuye rikomeje gufatwa nk’ishingiro ry’uburezi bufite ireme n’iterambere rirambye ry’u Rwanda.

IMIHIGO NEWS | With in the best news