MINEDUC yatangije imihigo mishya y’abarimu ishingiye ku musaruro w’imyigire y’abanyeshuri

Iyi gahunda yakozwe ku bufatanye na IPA na Georgetown University, igamije kongera ireme ry’uburezi binyuze mu gupima imikorere y’abarimu hashingiwe ku myiteguro, imyigishirize n’iterambere ry’abanyeshuri.

Minisiteri y’Uburezi (MINEDUC) ku bufatanye n’Ikigo Mpuzamahanga cy’Ubushakashatsi ku Politiki z’Iterambere (IPA) na Kaminuza ya Georgetown, yatangije igitabo ngenderwaho cyihariye kigamije gufasha abarimu gusobanukirwa no gushyira mu bikorwa imihigo ishingiye ku myigire y’abanyeshuri mu rwego rwo guteza imbere ireme ry’uburezi mu Rwanda.

Iki gitabo, kizwi nka Teacher Imihigo Intervention Manual, kigamije gutoza no gukangurira abarimu, abayobozi b’amashuri n’abashinzwe amasomo gushyira mu bikorwa imihigo igaragaza neza uruhare rwabo mu guteza imbere ubumenyi n’ubushobozi bw’abanyeshuri.

Ku rwego rw’ishyirwa mu bikorwa, harateganywa ko Abagenzuzi b’Uburezi ku rwego rw’Imirenge (SEIs) bazabanza guhugura abayobozi b’amashuri n’abungirije babo bashinzwe amasomo ku rwego rw’imirenge, nyuma abo bayobozi bagahugura abarimu ku rwego rw’amashuri ku bufatanye n’abashinzwe amasomo.

MINEDUC ivuga ko iyi gahunda igamije guhuza imihigo y’abarimu n’umusaruro ugaragara mu myigire y’abanyeshuri aho igice kimwe cy’imihigo kigendana n’imikorere y’umwarimu mu kazi ke ka buri munsi, ikindi gice kigashingira ku iterambere ry’abanyeshuri bigisha.

Muri iyi gahunda, imikorere y’umwarimu ipimwa hashingiwe ku bintu bine by’ingenzi birimo kuba ahari mu kazi (presence), imyiteguro y’amasomo (preparation) uburyo yigisha (pedagogy) ndetse n’uruhare rwe mu gutanga amakuru nyayo muri sisiteme ya CAMIS ikoreshwa mu gukusanya no gusesengura amanota y’ibizamini ku rwego rw’igihugu.

Igice cya kabiri cy’ingenzi kigizwe n’umusaruro w’abanyeshuri, aho harebwa iterambere bagaragaza mu bizamini rusange byandikwa muri CAMIS, umwarimu akagenerwa amanota hashingiwe ku nyungu abanyeshuri be bagize mu myigire ugereranyije n’abandi bigishwa mu byiciro bisa.

Aya manota ahuzwa ku kigero cya 50% ku mikorere y’umwarimu na 50% ku musaruro w’abanyeshuri, ubundi bigahindurwa amanota ya “percentile rank” hagati ya 0 na 100, hagamijwe kubahiriza ubutabera no kugereranya abarimu bigisha mu byiciro n’uturere bisa.

Guverinoma ivuga ko iyi gahunda izajyana n’itangwa ry’ishimwe rishingiye ku manota y’imihigo, aho abarimu bagaragaje umusaruro mwiza bazabona inyongera ku mishahara yabo ndetse bikabagirira akamaro mu kuzamurwa mu ntera no mu yindi myanya y’ubuyobozi mu burezi.

MINEDUC kandi igaragaza ko hateganyijwe gutanga ibisubizo ku barimu ku buryo buhoraho, bakamenyeshwa aho bageze, bagahabwa inama zubaka zigamije kubafasha kunoza imyigishirize no kongera umusaruro w’abanyeshuri.

Iyi gahunda ifatwa nk’intambwe ikomeye mu kongera inshingano n’ubunyamwuga mu burezi, ikaba igamije guhuza inyungu z’abarimu, abanyeshuri n’igihugu muri rusange, mu rugendo rwo kugera ku burezi bufite ireme kandi bushingiye ku musaruro ugaragara.

IMIHIGO NEWS | UBUREZI