Guverinoma y’u Rwanda yajyanye u Bwongereza mu rukiko mpuzamahanga, irushinja guhagarika amasezerano ku bushake

U Rwanda rurega u Bwongereza mu Rukiko Mpuzamahanga rw’Ubuhuza (PCA) ruvuga ko rwishe amasezerano ajyanye n’abimukira n’ubufatanye mu iterambere, rukanze kwishyura amafaranga yari yarumvikanyweho.

Guverinoma y’u Rwanda yatangaje ko yajyanye Guverinoma y’u Bwongereza mu Rukiko Mpuzamahanga rw’Ubuhuza (Permanent Court of Arbitration – PCA) rufite icyicaro i La Haye mu Buholandi, iyishinja kutubahiriza ku bushake amasezerano ibihugu byombi byari byaragiranye ajyanye no kohereza mu Rwanda abimukira badafite ibyangombwa no guteza imbere ubufatanye mu by’ubukungu.

Nk’uko byemejwe n’itangazo ry’Ibiro by’Umuvugizi wa Guverinoma y’u Rwanda, iki kirego cyatanzwe ku wa 24 Ugushyingo 2025 hashingiwe ku ngingo ya 22 y’ayo masezerano, iteganya ko impande zombi zigomba gukemura amakimbirane binyuze mu nzira zemewe n’amategeko mpuzamahanga.

Aya masezerano yatangijwe ku busabe bw’u Bwongereza, agamije gushakira umuti ikibazo cy’abimukira binjiraga muri icyo gihugu mu buryo bunyuranyije n’amategeko, cyane cyane abakoresha inzira z’amazi banyuze mu nyanja ya Manche, benshi muri bo bakabaho mu bihe bigoye kandi bibangamiye ubuzima bwabo.

Guverinoma y’u Rwanda ivuga ko ayo masezerano yari anagamije gukemura impamvu zishingiye ku busumbane mu mahirwe y’ubukungu n’imibereho hagati y’ibihugu, ari na byo akenshi bituma abantu bafata icyemezo cyo kwinjira mu bihugu byateye imbere mu buryo butemewe n’amategeko.

Itangazo rikomeza rigira riti: “Ubu bufatanye bwagaragazaga ubushake bw’u Rwanda mu gufasha abababaye, bushingiye ku mateka yarwo n’ubunararibonye mu kwakira no gucumbikira impunzi n’abimukira baturutse hirya no hino ku Isi.”

Mu Mata 2022 ni bwo u Rwanda n’u Bwongereza byashyize umukono ku masezerano ajyanye no kohereza i Kigali abimukira badafite ibyangombwa, ajyana n’ubufatanye mu iterambere ry’ubukungu. Aya masezerano yatangiye gushyirwa mu bikorwa ku mugaragaro ku wa 25 Mata 2024.

Icyakora, Sir Keir Starmer akimara gutorerwa kuyobora Guverinoma y’u Bwongereza muri Nyakanga 2024, yahise atangaza ko ayo masezerano ahagaritswe, avuga ko adatanga umusaruro mu gukumira abimukira bakomezaga kwinjira mu gihugu cye bakoresheje ubwato buto.

Leta y’u Rwanda yahise yamagana icyo cyemezo, igaragaza ko cyafashwe u Rwanda rutabanje kugishwa inama, bityo kikaba ari uguhonyora amasezerano ku bushake no kuyahagarika mu buryo bunyuranyije n’amategeko mpuzamahanga.

Mu itangazo, Guverinoma y’u Rwanda yagize iti: “Iki cyemezo cyafashwe u Rwanda rutabanje kubimenyeshwa, binyuranyije n’amahame n’uburyo bw’imikoranire bwari bwarumvikanyweho hagati y’impande zombi.”

Nyuma yo guhagarika ayo masezerano, u Rwanda rwamenyeshejwe ko nta bimukira bizongera koherezwa i Kigali, mu gihe Guverinoma y’u Bwongereza yatangaje ko iri gusuzuma uko ayo masezerano yakurwaho burundu.

Mu Ukuboza 2024, u Bwongereza bwasabye u Rwanda kutitwaza kwishyurwa miliyoni 50 z’Amapawundi zari ziteganyijwe kwishyurwa mu Mata 2025 no mu Mata 2026, buvuga ko impamvu ari uko bwari bumaze gufata icyemezo cyo guhagarika ayo masezerano.

Guverinoma y’u Rwanda ivuga ko yiteguye ko amasezerano ahagarikwa, ariko binyuze mu biganiro n’ubwumvikane busesuye, by’umwihariko ku ngingo zijyanye n’amafaranga yari yarumvikanyweho. Icyakora, ivuga ko ibyo biganiro bitigeze bibaho, ari na yo mpamvu ishimangira ko ayo mafaranga agomba kwishyurwa uko amasezerano abiteganya.

Mu kirego cyagejejwe mu Rukiko Mpuzamahanga rw’Ubuhuza, u Rwanda rushinja u Bwongereza kwanga kubahiriza inyandiko zemewe zisobanura uburyo amafaranga yagombaga kwishyurwa, kutubahiriza ingingo ya 18 y’amasezerano ijyanye n’amafaranga, no kwica ingingo ya 19 yerekeye kwakira no kwita ku bimukira babayeho mu bihe bigoye kurusha abaturage basanzwe baba mu Rwanda.

Guverinoma y’u Rwanda yemeza ko yagerageje inzira zose z’ibiganiro ariko u Bwongereza bukomeza kwinangira, ari na byo byatumye hafatwa icyemezo cyo kwitabaza inkiko mpuzamahanga.

N'ubwo bimeze bityo, u Rwanda ruratangaza ko rukomeje kwiyemeza gushakira ibisubizo ibibazo by’abimukira ku rwego mpuzamahanga, harimo kubashakira aho baba batekanye, kubafasha kubona amahirwe yo kwiteza imbere no kubaho mu cyubahiro, hashingiwe ku mahame mpuzamahanga y’ubutabazi n’uburenganzira bwa muntu.

 
IMIHIGO NEWS