U rwanda: Izamuka rikomeye ry’umusaruro n’ibiciro by'ikawa ku isoko mpuzamahanga mu 2025

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB) cyatangaje ko mu mwaka wa 2025, kawa u Rwanda rwohereje ku masoko mpuzamahanga yinjirije igihugu arenga miliyari 216 Frw, biturutse ku kwiyongera k’umusaruro, izamuka ry’ibiciro ku isoko mpuzamahanga ndetse n’izamuka ry’ubwiza bwa kawa nyarwanda.

Kawa ni kimwe mu bihingwa ngengabukungu bikomeje kugira uruhare rukomeye mu bukungu bw’u Rwanda. Mu myaka ishize, gahunda za Leta zo kuzamura umusaruro n’ubwiza byatumye kawa nyarwanda ikomeza kwiyongera ku masoko mpuzamahanga, bigira ingaruka nziza ku mafaranga yinjira mu gihugu.

NAEB yatangaje ko amafaranga yinjijwe na kawa mu 2025 yazamutse ava kuri miliyari zirenga 129 Frw zinjiye mu 2024, agera ku miliyari zirenga 216 Frw, bigaragaza izamuka ridasanzwe mu nyungu zituruka muri uwo musaruro.

Imibare igaragaza ko mu 2025, u Rwanda rwohereje hanze toni 23.860 za kawa, mu gihe mu 2024 rwohereje toni 17.142, bivuze ko umusaruro woherejwe hanze wiyongereyeho 39%, mu gihe amafaranga yinjijwe yiyongereyeho 65%.

Iri zamuka ryatewe ahanini n’izamuka ry’igiciro cya kawa ku isoko mpuzamahanga, aho cyazamutseho 19% mu 2025 ugereranyije n’umwaka wabanje. Ibi byatumye igiciro cya kawa y’u Rwanda kigera ku madorali 6,2 ku kilo, bituma ikomeza kwigarurira isoko no kwitabwaho kubera ubuziranenge bwayo.

Umuyobozi Mukuru wa NAEB, Bizimana Claude, yavuze ko ibi ari ikimenyetso cy’intambwe nziza u Rwanda ruri gutera mu rwego rwo guteza imbere ibihingwa byinjiriza igihugu amadovize.

Bizimana yagaragaje ko aya mafaranga yinjijwe azafasha u Rwanda kugera ku ntego rwihaye yo kuzajya rwohereza ku isoko mpuzamahanga toni zirenga ibihumbi 32 by’ikawa, bikazinjiriza igihugu arenga miliyoni 192 z’amadolari ya Amerika mu 2029, ubwo hazaba hasozwa gahunda ya NST2. Ibi byitezweho kongera ubushobozi bw’abahinzi no gushimangira ubukungu bw’igihugu.