Minisitiri w’Uburezi Joseph Nsengimana yasuzumye ireme ry’uburezi mu Ntara y’Iburasirazuba, ashima ikoreshwa rya AI mu mashuri

Urugendo rwibanze ku ireme ry’uburezi, ikoranabuhanga n’uruhare rw’amashuri nderabarezi,Minisitiri yagaragaje ko ikoranabuhanga n’AI ari inkingi yo guteza imbere uburezi mu Rwanda

Kuri uyu wa  Mbere itariki ya 19 Mutarama 2026, Minisitiri w’Uburezi mu Rwanda Bwana Nsengimana Joseph, yagiranye inama na Guverineri w’Intara y’Iburasirazuba Pudence Rubingisa bagamije gusuzuma uko ishami ry’uburezi rihagaze muri iyi ntara, baganira ku by’ingenzi biri ku isonga n’ingamba zifatika zo kongera uburyo bwo kubona no gutanga uburezi bufite ireme hifashishijwe cyane ikoranabuhanga.

Iyi nama yabereye mu Ntara y’Iburasirazuba mu gihe Guverinoma y’u Rwanda ikomeje gushyira imbaraga mu guteza imbere uburezi bufite ireme cyane cyane mu mashuri y’ibanze n’ayigisha abarimu (TTCs). Ni muri urwo rwego Minisitiri w’Uburezi yasuye n’amwe mu mashuri ari mu Karere ka Nyamata agamije kwirebera uko gahunda nshya zishyirwa mu bikorwa.

Mu biganiro Minisitiri Joseph Nsengimana yagiranye na Guverineri w’Intara y’Iburasirazuba, hibanzwe ku mbogamizi zikigaragara mu burezi n’uko zakemurwa, hibandwa ku kongera ireme ry’uburezi , kongera ibikoresho byifashishwa mu myigishirize ndetse no guteza imbere ubumenyi bw’abarimu.

Nyuma y’iyo nama, Minisitiri yakoze urugendo rwo gusura amashuri abiri ari mu Karere ka Nyamata arimo Groupe Scolaire Kamabuye na TTC Nyamata (Teacher Training College).

Ari muri Groupe Scolaire Kamabuye, Minisitiri yasuye abanyeshuri bo mu mwaka wa mbere, uwa kabiri n’uwa gatatu (P1, P2 na P3), abona uko bifashisha mudasobwa na tablette zifite porogaramu zishingiye ku bwenge bw’ubukorano (Artificial Intelligence – AI). Yashimangiye ko ikoreshwa ry’ikoranabuhanga mu myaka wa mbere w’amashuri rifite uruhare runini mu kongera ubushobozi bw’abanyeshuri no kubafasha gusobanukirwa neza amasomo.

Mu Ishuri Nderabarezi rya TTC Nyamata, Minisitiri Nsengimana yagarutse ku kamaro k’Amashuri nderabarezi(TTC)  mu rwego rw’igihugu, avuga ko zitategura gusa abarimu b’ejo hazaza ahubwo zinagira uruhare rukomeye mu guhanga no gutegura abazavamo abanyarwanda bafite ubumenyi n’indangagaciro bizubakira ejo hazaza heza h’igihugu.

Minisitiri w’Uburezi yagaragaje ko ubuyobozi bw’igihugu buzakomeza gushyigikira Intara y’Iburasirazuba mu guteza imbere uburezi binyuze mu kongera ikoreshwa ry’ikoranabuhanga, kongerera abarimu ubumenyi no guteza imbere amashuri nderabarezi. Yanasabye abayobozi b’inzego z’ibanze gukomeza gukorana n’abafatanyabikorwa mu burezi kugira ngo intego yo gutanga uburezi bufite ireme igerweho mu gihugu hose.

IMIHIGO NEWS| With in the best News