REB yatangaje urutonde rw’abarimu 10,664 batitabiriye amahugurwa y’Icyongereza ku rwego rwa B2

Abarimu bo mu mashuri abanza n’ayisumbuye basabwe gutanga ibisobanuro, inzego z’ibanze zisabwa gufata ingamba mu byumweru bibiri

Urwego rw’Igihugu rushinzwe Uburezi bw’Ibanze (REB) ku bufatanye n’ikigo Education First (EF) rwatangaje ko abarimu 10,664 bo mu mashuri abanza n’ayisumbuye bagaragaye nk’abatitabiriye neza amahugurwa y’ubumenyi bw’Icyongereza (English Proficiency Training Programme) maze rusaba inzego z’ibanze kubandikira gusuzuma ibisobanuro byabo no gufata ingamba zikwiye mu gihe batubahirije ibisabwa.

Iyi gahunda y’igihugu yo kongerera abarimu ubumenyi mu Cyongereza yatangijwe mu rwego rwo kuzamura ireme ry’uburezi mu Rwanda cyane ko Icyongereza ari rwo rurimi rukoreshwa mu myigishirize. Iyi Gahunda igamije gufasha abarimu bose bari mu kazi kugera ku rwego rwa B2 rufatwa nk’urwego ntarengwa rwemerera umwarimu gutanga amasomo neza.

REB, ku bufatanye na Education First (EF), yatangije icyiciro cya mbere cy’amahugurwa y’igihugu yose agamije kongerera abarimu bari mu kazi ubumenyi bw’Icyongereza. Iyi gahunda irebwa naburi mwarimu wese uri mu kazi (mandatory) ku barimu bose bo mu mashuri abanza n’ayisumbuye.

Nyamara, raporo z’igenzura zihoraho zashyikirijwe REB zigaragaza ko hari umubare munini w’abarimu batitabira amahugurwa uko bikwiye, abandi bakaba batayatangiyemo na gato. Abo barimu bashyizwe mu byiciro bitatu birimo off-track (batagenda ku murongo w’amahugurwa), inactive (badakora ibikorwa bya gahunda) n’abatari barigeze biyandikisha.

Ku bw’impamvu z’uburyozwe n’imikorere myiza y’iyi gahunda y’igihugu, REB yasabye abayobozi b’uturere gufata ingamba zirimo:

• Kwandikira ku mugaragaro abarimu bose bari mu byiciro byavuzwe haruguru, basabwa gutanga ibisobanuro byanditse bigaragaza impamvu batitabiriye amahugurwa uko bisabwa.
• Gufatira ingamba z’ubuyobozi cyangwa ibihano abarimu bagaragayeho kudakurikiza ibisabwa nta mpamvu yumvikana, hashingiwe ku mategeko n’amabwiriza agenga abakozi b’uburezi bw’ibanze.
• Gutegura no kohereza kuri REB raporo ihuriweho igaragaza uko buri mwarimu yitwaye, ibisobanuro yatanze, ingamba zafashwe n’igenamigambi ryo gukurikirana iyubahirizwa ry’aya mahugurwa.

REB kandi yanagaragaje ko urutonde rw’abo barimu rwasohotse rwatandukanyijwe hakurikijwe Akarere, Umurenge n’Ishuri, kugira ngo inzego z’ibanze zibashe kubakurikirana byoroshye.

REB yasabye abayobozi b’uturere gushyira mu bikorwa izi ngamba mu gihe kitarenze ibyumweru bibiri nyuma yo kwakira ubu busabe, igaragaza ko imikoranire n’ubufatanye bw’inzego zose ari ingenzi mu gutuma iyi gahunda igera ku ntego yayo. Uru rwego rwanashimangiye ko kuzamura ubumenyi bw’abarimu mu Cyongereza ari imwe mu nkingi zo guteza imbere uburezi bufite ireme no kunoza ireme ry’imyigishirize mu mashuri y’u Rwanda.

Urutonde rwose scan iyi code 

REba urutonde




MIHIGO NEWS | With in the best News