RWANDA: Minisitiri w’Ingabo yakiriye Abadepite ba Namibia mu ruzinduko rwo kwigira ku mutekano n’imibanire mpuzamahanga

                    minisitiri-wingabo-rwanda-yakiriye-abadepite-ba-namibia.jpg

Kuri uyu wa Gatatu tariki ya 28 Mutarama 2026, Minisitiri w’Ingabo z’u Rwanda Juvenal Marizamunda, yakiriye Abadepite bagize Komisiyo y’Ububanyi n’Amahanga n’Umutekano mu Nteko Ishinga Amategeko ya Namibia bari mu Rwanda mu ruzinduko rw’akazi rugamije kungurana ubumenyi ku buryo igihugu cyubaka amategeko n’amabwiriza bijyanye n’umutekano n’imibanire mpuzamahanga.

Aba badepite basuye u Rwanda mu rwego rwo kwigira ku bisubizo by’igihugu mu gushimangira umutekano, imikorere y’inzego z’umutekano n’uruhare rw’igisirikare mu iterambere n’umutekano w’igihugu, hashingiwe ku mategeko n’amabwiriza yashyizweho mu myaka ishize.

Mu biganiro bagiranye na Minisitiri Juvenal Marizamunda, hashimangiwe ubunararibonye bw’u Rwanda mu kubaka inzego z’umutekano zishingiye ku mategeko, kubahiriza ubusugire bw’igihugu no kugira uruhare mu mutekano w’akarere n’isi muri rusange binyuze mu butumwa bwo kubungabunga amahoro (peacekeeping).

Minisitiri w’Ingabo z’u Rwanda Juvenal Marizamunda yakiriye Abadepite ba Namibia mu ruzinduko rw’akazi i Kigali.

Minisitiri w’Ingabo yagaragarije aba badepite ko imiyoborere myiza, amategeko asobanutse n’imikoranire myiza hagati y’inzego z’igihugu ari inkingi ikomeye yafashije u Rwanda kugera ku mutekano urambye, anashimangira ko ubufatanye mpuzamahanga ari ingenzi mu guhangana n’ibibazo by’umutekano muri iki gihe.

Uru ruzinduko rw’Abadepite ba Namibia ruri mu murongo wo gushimangira umubano hagati y’ibihugu byombi, binyuze mu gusangira ubunararibonye mu bijyanye n’imiyoborere, umutekano n’imibanire mpuzamahanga, hagamijwe iterambere n’umutekano birambye.

IMIHIGO NEWS| Politiki | Umutekano