Gatsibo: KOICA igiye kubaka isoko ryigezweho i Kabarore ritezwe guhindura ubucuruzi bw’abaturage

Abayobozi n’abafatanyabikorwa basuye isoko risanzwe rikorera muri ako gace

Ikigo Mpuzamahanga gishinzwe ubutwererane bwa Korea y’Epfo (KOICA), ku bufatanye n’ubuyobozi bw’Akarere ka Gatsibo, batangiye imyiteguro y’umushinga wo kubaka isoko rigezweho mu Murenge wa Kabarore, rigamije guteza imbere ubucuruzi, kongera umutekano w’ibicuruzwa no kurinda abacuruzi ibihombo baterwaga n’imvura n’ivumbi.

Isoko rya Kabarore risanzwe rikorwamo n’abacuruzi benshi rigiye guhabwa isura nshya binyuze mu mushinga uzubakwa ku bufatanye bwa KOICA n’Akarere ka Gatsibo. Ubuyobozi bw’akarere bwemeza ko uyu mushinga uri mu cyiciro cy’inyigo igamije kumenya ingengo y’imari no gutegura ibikorwa by’ubwubatsi mu buryo burambuye.

Abaturage n’abacururiza mu isoko rya Kabarore bavuga ko kubakirwa isoko rigezweho ari amahirwe akomeye azabafasha kunoza serivisi batanga no kwirinda ibibazo byakundaga kubangamira ubucuruzi bwabo.

Abacuruzi bagaragaza ko isoko basanganywe ridasakaye neza kandi rikaba rito, bigatuma mu gihe cy’imvura ibicuruzwa byangirika, naho mu gihe cy’izuba ivumbi rikabihumanya. Ibi byatumaga bamwe mu bacururiza hanze y’isoko badashobora gukora uko bikwiye.

Mutoni Jane, umwe mu bacururiza muri iri soko, yavuze ko bakiriye iyi nkuru n’ibyishimo byinshi. Yagize ati:
“Tunejejwe no kuba ubuyobozi bwaratwumvise bukaza kudusura bukatubwira ko isoko rigiye kubakwa. Bizaturinda ibihombo twaterwaga n’imvura n’ivumbi, kandi bizatuma dukorera ahantu hizewe.”

Kamikazi Diane na we yavuze ko iri soko rishya rizafasha cyane n’abacururiza hanze y’isoko basanzwe. Ati:
“Iyo imvura yagwaga hari abahagarikaga akazi burundu. Ibi byaduteye igihombo kinini. Kubakirwa isoko rigezweho bigaragaza ko ubuyobozi bwacu bwita ku bibazo by’abaturage.”

Muhayimana Gerard ucururiza hafi y’iri soko yavuze ko iri soko rizagira akamaro ku Murenge wa Kabarore wose, kuko rizatuma ibikorwa by’ubucuruzi byiyongera, abaguzi n’abashoramari bakiyongera bityo iterambere rikihuta.

Umuyobozi w’Akarere ka Gatsibo wungirije ushinzwe Iterambere ry’Ubukungu, Sekanyange Leonard, yabwiye Imvaho Nshya ko imyiteguro y’uyu mushinga irimbanyije.
Yagize ati: “Ubu turi mu cyiciro cy’inyigo izagena ingengo y’imari izakenerwa, hanyuma mu kwa Gatandatu dutangire imirimo yo kubaka iri soko rigezweho rifasha abaturage gukora ubucuruzi budafite imbogamizi.”

Kubaka isoko rigezweho i Kabarore bitegerejweho kongera umutekano w’ubucuruzi, kuzamura ubukungu bw’abaturage no guteza imbere isura y’uyu murenge. Uyu mushinga ugiye kwiyongera ku bindi bikorwa bya KOICA mu Karere ka Gatsibo birimo guteza imbere ubuhinzi, amazi n’ibindi bikorwa remezo bigamije iterambere rirambye ry’abaturage.

IMIHIGONEWS