Goma: Indege ya mbere iguye ku kibuga kigenzurwa na AFC/M23, Loni itangiza ibiganiro by’amahoro

Ikibuga mpuzamahanga cya Goma

Kuri uyu wa 12 Gashyantare 2026, indege ya mbere yageze ku Kibuga Mpuzamahanga cy’Indege cya Goma, mu Ntara ya Kivu y’Amajyaruguru, nyuma y’igihe kirenga umwaka uyu mujyi ugenzurwa n’umutwe wa AFC/M23. Iyi ndege yazanye Intumwa Idasanzwe y’agateganyo y’Umunyamabanga Mukuru wa Loni, Vivian van de Perre, ugiye kugirana ibiganiro n’abayobozi b’uyu mutwe ku bijyanye n’umutekano n’amahoro mu Burasirazuba bwa Repubulika Iharanira Demokarasi ya Congo.

Amakuru aturuka i Goma agaragaza ko iyi ndege yakiriwe ku kibuga cy’indege kuri uyu wa Kane mu gikorwa kibonwa nk’intambwe nshya mu biganiro bigamije gushaka igisubizo cy’amakimbirane amaze igihe mu Burasirazuba bwa Congo.

Iki kibuga cy’indege cyari kimaze igihe kidakorerwaho ingendo zisanzwe nyuma y’uko umujyi wa Goma ufashe n’abarwanyi ba AFC/M23. Kugaruka kw’ingendo z’indege bifatwa nk’ikimenyetso cy’impinduka mu mikorere y’ibikorwa by’ubwikorezi n’itumanaho muri aka gace.

Vivian van de Perre, washyizweho by’agateganyo nk’Intumwa Idasanzwe y’Umunyamabanga Mukuru wa Loni akaba anayobora by’agateganyo ubutumwa bwa MONUSCO, biteganyijwe ko agirana ibiganiro n’abayobozi ba AFC/M23 ku bijyanye n’ikorwa ry’amasezerano y’agahenge, kurinda abasivili no kureba uko amahoro arambye yagerwaho.

AFC/M23 ivuga ko igenzura umujyi wa Goma n’ibikorwa birimo n’ikibuga cy’indege, ikemeza ko kwakira iyi ntumwa ya Loni biri mu rwego rwo gushyigikira ibiganiro bya politiki no gushaka umuti w’ibibazo by’umutekano muke bimaze imyaka myinshi muri aka karere.

Ku ruhande rwa Loni, MONUSCO isanzwe ifite inshingano zo gufasha mu kugarura no kubungabunga amahoro muri Congo, cyane cyane mu duce twibasiwe n’imitwe yitwaje intwaro.

Iburasirazuba bwa Congo bikomeje kuba isibaniro ry’imirwano hagati y’ingabo za Leta ya RDC n’imitwe yitwaje intwaro itandukanye, ibintu byatumye abaturage benshi bahunga ingo zabo ndetse ibikorwa remezo birimo n’ibibuga by’indege bigira ingaruka zikomeye.

Isubukurwa ry’ingendo z’indege i Goma rishobora kugira uruhare mu koroshya ibikorwa by’ubutabazi n’ibiganiro bya dipolomasi, nubwo hakiri impungenge ku mutekano urambye muri aka gace.

Abasesenguzi mu bya politiki mpuzamahanga bagaragaza ko ibiganiro hagati ya Loni n’impande zishyamiranye bishobora kuba intangiriro y’inzira igana ku mahoro, ariko bikazaterwa n’ubushake bwa politiki n’ishyirwa mu bikorwa ry’ibyemeranyijweho.

Imihigonews|Umutekanompuzamahanga