Ngoma: Abaturage bo mu mirenge itatu basanye umuhanda wa kilometero 12.5 mu muganda usoza Mutarama 2026

Abaturage bo mu mirenge itatu igize Akarere ka Ngoma ariyo Zaza, Karembo na Mugesera, bakoze umuganda rusange usoza ukwezi kwa Mutarama 2026, basana ibice by’umuhanda munini wa kilometero 12.5 wari warangiritse cyane, ugashyirwamo uruceceri (laterite) hagamijwe koroshya imigenderanire.

Uyu muganda wabereye mu Murenge wa Zaza, uhuza abaturage bo mu bice bitandukanye bya Zaza, Karembo na Mugesera hifashishijwe imashini itsindagira uruceceri kugira ngo umuhanda urusheho gukomera no kwihanganira imvura nyinshi.

Abashinzwe igenagaciro n’ubutaka mu Karere ka Ngoma bavuze ko uyu muhanda wari warangiritse ku buryo bugaragara cyane cyane bitewe n’amazi yawunyuragamo n’imyanda yibumbiraga mu mifuka y’amazi, bigateza isuri n’ingaruka ku mirima y’abaturage.

Ibikorwa by’uyu muganda byatangiriye mu Murenge wa Karembo mu isanteri bikomeza mu Murenge wa Zaza ku ishusho yabikiramariya no mu Mugesera, ku muhanda uhuza iyi mirenge itatu.

Abaturage baganiriye n’ikinyamakuru dukesha iyinkuru MUHAZIYACU, Bagitangarije ko uyu muhanda wari ubangamiye cyane ubuzima bwabo bwa buri munsi.  Mukarushema Consolée wo mu Murenge wa Karembo, Akagari ka Karaba, Umudugudu wa Rusumbantwari, yavuze ko bishimira iki gikorwa kuko umuganda usanzwe utari gushobora gukemura iki kibazo.

Yagize ati: “Turashima ko twaje gukora uyu muganda kuko harekaga amazi menshi, ugasanga imodoka, igare na moto bigorwa no kuhanyura. Hari n’ibiziba ku buryo n’umuntu wahanyuraga byamugiriraga ingaruka.”

Nzeyimana François wo mu Murenge wa Zaza we yavuze ko imyanda yari yarazibye rigori ku ruhande rw’umuhanda bigatuma amazi awunyuramo awangiza, anateza isuri mu mirima yabo.

Umumotari ukorera muri iyi mirenge itatu, Cyubahiro Constantin, yashimye uruhare rw’ubuyobozi n’abaturage, avuga ko uyu muhanda wari warangiza moto zabo bitewe n’imvura n’ibinogo byawurangagamo.

Ati: “Imvura nyinshi yari yawangije uyu muhanda ku buryo wangizaga moto zacu, amapine agasaza buri munsi. Ubu turashimira ubuyobozi bwadufashije kuwusana.”

Umuyobozi wungirije w’Akarere ka Ngoma ushinzwe imibereho myiza y’abaturage, Mukayiranga Marie Gloriose, yashimiye abaturage n’abafatanyabikorwa bagize uruhare mu kubona laterite no gusibura uyu muhanda.

Yagize ati: “Muri uyu muganda twagize abaturage bagera hafi ku 1,500 baturutse mu mirenge itandukanye, barimo abamotari n’abanyonzi, kandi babikoze ku bushake.”

Visi Meya Mukayiranga yashishikarije abaturage gukomeza kubungabunga uyu muhanda cyane cyane abafite amasambu awukora ku mpande, basukura rigori kandi bakirinda kuwusibamya.

Uyu muganda kandi watanzwemo ubutumwa butandukanye burimo isuku n’isukura, kubungabunga ibishanga, ibiganiro ku bikorwa by’Intwari z’u Rwanda, kwicungira umutekano, kwirinda ibiyobyabwenge n’izindi ngingo zigamije iterambere n’imibereho myiza y’abaturage.