UAE: Uko Ibihugu 7 Byishyize Hamwe Bikubaka Igihangange mu Bukungu ku Isi

Abu Dhabi, UAE – Leta Zunze Ubumwe z’Abarabu (UAE) ni ihuriro ry’ibihugu birindwi byiyemeje gukorera hamwe hagamijwe guteza imbere ubukungu, umutekano n’imibereho y’abaturage. Iri huriro ryashinzwe mu 1971, nyuma y’uko ibihugu bitandatu byiyunzeho, mu gihe Ras Al Khaimah yo yaryinjiyemo mu 1972.

UAE igizwe n’ibihugu bizwi nka Emirates, buri kimwe kikagira umwihariko mu bukungu n’ibikorwa by’iterambere bituma igihugu cyose gikomeza gutera imbere ku rwego mpuzamahanga.

Amateka y’ishyirwaho rya UAE

Ku wa 2 Ukuboza 1971, ibihugu bitandatu ari byo Abu Dhabi, Dubai, Sharjah, Ajman, Umm Al Quwain na Fujairah byiyemeje kwishyira hamwe bishyiraho ihuriro rya UAE. Nyuma y’amezi make, ku wa 10 Gashyantare 1972, igihugu cya Ras Al Khaimah cyongeyeho kiba icya karindwi kigize iri huriro.

Iyi ntambwe yabaye ingenzi mu gushimangira ubufatanye hagati y’ibi bihugu byari bisanzwe bifitanye umubano wa hafi mu bijyanye n’ubucuruzi n’umuco.

Ibihugu bigize UAE n’ibikorwa by’ingenzi by’ubukungu

Abu Dhabi, ari na yo murwa mukuru wa UAE, ni cyo gihugu gifite ubutaka bunini kurusha ibindi, kikaba kizwi cyane ku bukire bukomoka kuri peteroli na gaze.

Dubai yo yigaragaje cyane nk’ihuriro mpuzamahanga ry’ubucuruzi, ubukerarugendo, ibikorwa by’imari ndetse n’ubwikorezi bwo mu kirere, bituma iba imwe mu mijyi ikomeye ku isi mu by’ubukungu.

Sharjah izwi cyane mu guteza imbere umuco, uburezi n’inganda, ikaba ifatwa nk’ahantu hakomeye mu bikorwa by’ubumenyi n’umuco mu karere.

Ajman, n’ubwo ari yo nto mu bihugu bigize UAE, ifite ibikorwa bikomeye mu nganda z’ubwubatsi, ubucuruzi bwo mu nyanja n’uburobyi.

Umm Al Quwain yo ishingira ubukungu bwayo cyane ku burobyi, ubuhinzi bw’itende (dates) ndetse n’ubukerarugendo bushingiye ku myidagaduro n’ibidukikije.

Fujairah ni cyo gihugu cyonyine muri UAE giherereye ku Nyanja y’Ubuhinde, kikaba kizwi cyane ku byambu bikomeye no kubika peteroli.

Ku rundi ruhande, Ras Al Khaimah, cyinjiye muri iri huriro mu 1972, kimenyerewe ku nganda zikora ibikoresho by’ubwubatsi nk’isima na seramike, ndetse n’ubuhinzi.

UAE ikomeje kwagura ubukungu

N’ubwo mu myaka ya mbere peteroli na gaze ari byo byari inkingi y’ubukungu bwa UAE, iki gihugu cyashyize imbaraga mu kwagura ubukungu mu nzego zitandukanye zirimo ubukerarugendo, serivisi z’imari, ubwikorezi bwo mu kirere n’ikoranabuhanga.

Uyu mugambi wo kudashingira ku mutungo kamere gusa watumye UAE ihinduka kimwe mu bihugu bifite ubukungu bukomeye kandi butera imbere ku isi.

Ubufatanye bw’ibihugu birindwi byiyemeje gukorera hamwe bwagize uruhare runini mu kubaka UAE igezweho. Uyu munsi, iki gihugu gifatwa nk’icyitegererezo mu iterambere ryihuse ry’ubukungu, ikoranabuhanga n’ishoramari mpuzamahanga.

IMIHIGONEWS.RW