Uganda: Depite Loydah Muhimbura Yarezwe Mu Nkiko Ashinjwa Impamyabumenyi Mpimbano

Umudepite uherutse gutorerwa guhagararira abagore mu gace ka Mbarara mu Nteko Ishinga Amategeko ya Uganda, Loydah Muhimbura, yajyanywe mu nkiko na mugenzi we bari bahanganye mu matora, amushinja gukoresha impamyabumenyi y’impimbano mu kwiyamamaza.

Iki kirego cyatanzwe na Margaret Ayebare Rwebyambu, umwe mu bahataniraga uwo mwanya ariko akaza gutsindwa na Muhimbura mu matora yabaye vuba aha.

Ayebare yitabaje Urukiko Rukuru rwa Mbarara asaba ko amatora yasuzumwa, avuga ko yatsinzwe n’umuntu uvugwaho gukoresha impamyabumenyi itizewe. Avuga ko impamyabumenyi Muhimbura agaragaza mu bijyanye n’ubuforomo ari yo yamufashije kwiyamamaza, ariko ko hari amakuru agaragaza ko ishobora kuba itari iy’ukuri.

Mu kirego cye, Ayebare asobanura ko azi neza ko Muhimbura atatsinze neza amasomo y’ingenzi mu mashuri yisumbuye, cyane cyane Isomo ry’Ibinyabuzima, rifite uruhare runini mu kwemererwa kwiga ubumenyi bw’ubuforomo muri kaminuza. Ahamya ko mu bizamini bisoza amashuri yisumbuye muri Uganda, Muhimbura yabonye amanota yo hasi cyane (F9) muri iryo somo, bigatuma hibazwa uburyo yabonye impamyabumenyi yo ku rwego rwa kaminuza mu bijyanye n’ubuforomo.

Kugeza ubu, Loydah Muhimbura ntaratangaza icyo atekereza kuri ibi birego bimushinja gukoresha impamyabumenyi mpimbano.

Abasesenguzi bavuga ko niba urukiko rwemeje ko ibyo birego bifite ishingiro, bishobora gutuma Muhimbura atakaza umwanya w’ubudepite aherutse gutorerwa mu Nteko Ishinga Amategeko ya Uganda.