REB yihaye intego yo kuzamura ireme ry’uburezi n’Icyongereza mu mashuri y’abarimu

Umuyobozi wa REB bwana Dr. Nelson Mbarushimana

Ku wa 30 Mutarama 2024, Umuyobozi Mukuru wikigo cy’igihugu gishinzwe uburezi bw’ibanze (REB) Bwana Dr. Nelson Mbarushimana, yayoboye inama yahuje abayobozi b’Amashuri Nderabarezi (TTCs) 16 n’Abayobozi b’amasomo (Deans of Studies), igamije gusuzuma ireme ry’uburezi no kongerera imbaraga gahunda yo guteza imbere ubumenyi mu Cyongereza.

Iyi gahunda iterwa inkunga na World Bank, ikaba igamije gutuma amashuri nderabarezi aba icyitegererezo ku yandi mashuri mu Rwanda.

Mu ijambo rye ritangiza inama, Dr. Mbarushimana yashimiye abayobozi ba TTC ku ruhare rwabo mu gutegura abarimu b’ejo hazaza, abasaba kurushaho kurwanya ikibazo cyo guta ishuri.

Yagize ati:“Abarimu badufashije kugera aho turi uyu munsi. Ndabasaba kwegera abanyeshuri, mukabamenya neza, mukubaka icyizere n’imikoranire myiza bizabafasha kumenya ibibazo byabo no kubishakira ibisubizo.”

REB yasabye abayobozi b’amashuri kwimakaza indangagaciro zirimo ubumwe, gukunda igihugu, ubudaheranwa, gukorana no gukunda umurimo.

Yagaragaje ko abarimu ari nk’ababyeyi barera ejo hazaza h’igihugu, bityo bagomba guha abanyeshuri indangagaciro bazakura bazikwirakwiza no mu bandi.

Guteza imbere Icyongereza byagarutsweho cyane nk’inkingi ikomeye mu gutegura abarimu bashoboye guhangana ku isoko ry’umurimo.

Abarimu batozwa ubumenyi bune bw’ingenzi:

• Kuvuga (Speaking)
• Gusoma (Reading)
• Kwandika (Writing)
• Kumva (Listening)

  

  REB ifite intego yo kuzamura urwego rw'abarimu mu cyongereza B2 Level

Jean Paul Niyonshuti, umuyobozi wa TTC de la Salle, yavuze ko abanyeshuri barangiza amasomo bagomba kuba bashoboye kwigisha neza mu Cyongereza kandi bafite icyizere.

Abanyeshuri bapimwa bageze mu mwaka wa kane w’amashuri yisumbuye, hagamijwe kumenya urwego rwabo mu Cyongereza.

Hakurikizwa gahunda ibafasha kuzamuka mu byiciro bitandukanye kugeza buri wese arangije afite icyemezo cy’ubumenyi mu Cyongereza (English Proficiency Certificate).

REB yasabye abarimu gukoresha ikoranabuhanga (ICT) na interineti mu kongera ubumenyi no kunoza imyigishirize.

Uyu mushinga urimo:

• Guteza imbere TTCs 16
• Gushyiraho amashuri 17 y’icyitegererezo
• Kugerageza uburyo bushya bwo kwigisha buzashyirwa mu gihugu hose

Hari kandi gahunda ya Residency Program iri gukorerwa muri TTC de la Salle na TTC Save, aho abarangije bahabwa amahirwe yo kwimenyereza umwuga cyane cyane mu Cyongereza no mu ikoranabuhanga.
Uyu mushinga unibanda ku burezi bw’ibanze (Early Childhood Education), harimo:

• Gutanga ibikoresho byo kwigisha mu mashuri y’inshuke
• Gutegura amasomo y’amajwi n’amashusho mu Kinyarwanda n’Icyongereza

Ibi bigamije kubaka neza umusingi w’uburezi bw’abana bato no guteza imbere ubumenyi bw’Abanyarwanda muri rusange.

Iyi gahunda igaragaza umuhate w’u Rwanda mu kuzamura ireme ry’uburezi, gutegura abarimu b’abahanga no guha abanyeshuri ubumenyi bujyanye n’igihe, bityo bakazashobora guhangana ku rwego mpuzamahanga.

REB, TTC Rwanda, Icyongereza mu mashuri, uburezi mu Rwanda, abarimu, World Bank, ireme ry’uburezi, English proficiency Rwanda