U Rwanda rwizihije Umunsi w’Umurimo 2026: Minisitiri Nkulikiyinka asaba ubufatanye mu kongera imirimo

Minisitiri w’Abakozi ba Leta n’Umurimo Madamu Nkulikiyinka Christine, yayoboye ibirori byo kwizihiza Umunsi Mpuzamahanga w’Umurimo byabereye muri Kaminuza y'u Rwanda, bishimangira uruhare rw’abakozi mu iterambere ry’igihugu.

Ibi birori byabaye kuri uyu wa 01 Gicurasi 2026, byahurije hamwe abakozi, abakoresha ndetse n’abafatanyabikorwa batandukanye, hagamijwe kuzirikana no guha agaciro uruhare rw’abakozi mu iterambere ry’u Rwanda.

Byari bifite insanganyamatsiko igira iti: “Gufatanya mu guteza imbere ubumenyi, kongera imirimo no kubaka ubukungu burambye bushingiye ku mbaraga z’imbere mu gihugu.”

Iyi nsanganyamatsiko yagaragaje akamaro k’ubufatanye hagati y’inzego zitandukanye mu guteza imbere ubumenyi ku bakozi, guhanga imirimo mishya no kubaka ubukungu bushobora guhangana n’ihungabana rituruka ku rwego mpuzamahanga.

Inkuru imihigonews ikesha ukwelitimes.com ivuga ko abitabiriye ibi birori baganiriye ku ngamba zafasha kongera umuvuduko mu guhanga imirimo mishya, kuzamura umusaruro w’abakozi no guteza imbere inzego z’ingenzi zirimo ubuhinzi, inganda na serivisi. Hanagarutswe kandi ku kamaro ko gukomeza guteza imbere ikoranabuhanga no kunoza serivisi zitangwa, mu rwego rwo kugera ku iterambere rirambye kandi ridaheza.

By’umwihariko, hibanzwe ku guteza imbere ubumenyi bw’urubyiruko bujyanye n’ibikenewe ku isoko ry’umurimo, hagamijwe kurufasha kubyaza umusaruro amahirwe igihugu gifite cyane ko urubyiruko rugize igice kinini cy’abaturage.

Mu ijambo rye, Minisitiri Christine Nkulikiyinka yongeye gushimangira ko Guverinoma y’u Rwanda yiyemeje guteza imbere imirimo ifite agaciro kandi itanga umusaruro, kongerera imbaraga ubufatanye n’abafatanyabikorwa ndetse no gukomeza guharanira ko iterambere ry’ubukungu rigira uruhare rufatika mu kuzamura imibereho myiza y’Abanyarwanda bose.

Minisitiri Christine Nkulikiyinka yayoboye uyu munsi Mpuzamahanga w’Umurimo 2026, hibandwa ku gufatanya guteza imbere ubumenyi no kongera imirimo mu Rwanda.

Umunsi w’Umurimo, Christine Nkulikiyinka, Abakozi mu Rwanda, Imirimo, Ubukungu, Rwanda, Labour Day 2026