Bugesera: Ibitaro bya Rilima byizihije Umunsi Mpuzamahanga w’Abarwayi, Dr Nzayisenga asaba abaganga kurangwa n’impuhwe

Abayobozi n’abarwayi mu kwizihiza Umunsi Mpuzamahanga w’Abarwayi mu Bitaro bya Rilima 2026

Ibitaro bya Rilima (ROSH Ste Marie) biherereye mu Karere ka Bugesera byizihije Umunsi Mpuzamahanga wahariwe Abarwayi, wizihizwa buri mwaka ku wa 11 Gashyantare ku rwego rw’Isi. Ku rwego rw’ibi bitaro, ibirori byabaye ku Cyumweru tariki 22 Gashyantare 2026, bihuriza hamwe abayobozi, abakozi b’ubuzima n’abarwayi, hagamijwe kubaha agaciro no kubaremamo icyizere cyo gukira.

Uyu munsi wizihijwe ku nshuro ya 34 ku rwego mpuzamahanga, witabirwa n’abayobozi batandukanye barimo Umunyabanga Nshingwabikorwa w’Umurenge wa Rilima wahagarariye ubuyobozi bw’Akarere ka Bugesera, inzego z’umutekano, abihayimana, abarwayi n’abanyeshuri baturutse mu bigo by’amashuri bituranye n’ibitaro.

Umuyobozi Mukuru w’Ibitaro bya Rilima, Dr. Nzayisenga Albert, yibukije abaganga n’abandi bakozi b’ubuzima ko ubuvuzi budakwiye kugarukira ku miti n’ibikoresho gusa, ahubwo bugomba kujyana n’impuhwe n’ubwitange.

Yagize ati: “Umurwayi uza kwa muganga akenshi aba ababaye, afite impungenge cyangwa ubwoba. Inshingano z’umuganga si ukuvura umubiri gusa, ni no kumva umutima w’umurwayi no kumusobanurira mu bwitonzi ibyo agiye gukorerwa.”

Yakomeje ashimangira ko impuhwe ari inkingi ya mwamba mu buvuzi, kuko zitanga icyizere kandi zikongera imbaraga zo gukira. Yavuze ko buri muganga ukora mu rwego rw’ubuzima akwiye kwibona nk’umuntu uhamagariwe kurangwa n’ubumuntu, atavanguye umurwayi ku nkomoko, ubushobozi cyangwa imiterere ye.

Insanganyamatsiko y’uyu mwaka igira iti: “Kugira impuhwe nk’iz’Umusamariya – Gukunda wakira ububabare bw’undi,” yasobanuwe nk’umuhamagaro ku bakozi b’ubuzima wo gushyira imbere ineza n’urukundo mu kazi ka buri munsi.

Abarwayi barwariye muri ibi bitaro bagaragaje ko kwizihiza uyu munsi bibubakiye icyizere, kuko bibereka ko batitaweho gusa mu buvuzi, ahubwo banazirikanywa nk’abantu bafite agaciro.

Ndayizigiye Charles w’imyaka 70 uri kwivuza imvune, yavuze ko yishimiye uko bakiriwe n’uko babasengera ndetse bakabazirikana mu buryo bwihariye. Yemeza ko serivisi bahabwa zituma agira icyizere cyo gukira agataha.

Undi murwayi, Kageruka Emmanuel waturutse i Nyamirambo mu Mujyi wa Kigali, yavuze ko yaje kwivuza yumvise ko Ibitaro bya Rilima bifite ubunararibonye mu kuvura ubumuga bw’amagufwa n’ingingo. Yagaragaje ko uyu munsi wamwibukije ko uburwayi atari inenge, ahubwo ari ikibazo gikeneye ubufasha n’ubufatanye.

Yongeyeho ko yifuza ko ijwi ry’umurwayi rikomeza kumvikana, rikagira uruhare mu byemezo bireba ubuzima bwe, kandi ko umuryango nyarwanda ukwiye gukomeza kurangwa n’impuhwe no gufashanya.

Mu rwego rwo kwifatanya n’abarwayi, hatanzwe impano zirimo ibikoresho bibafasha mu buzima bwa buri munsi n’inkunga y’amafaranga, hagamijwe kubafasha mu bikenewe by’ibanze. Hanatanzwe ubutumwa bwubaka, burimo imivugo n’amagambo akomeza abarwayi, bubibutsa ko batari bonyine.

Ubuyobozi bw’Ibitaro bya Rilima bwagaragaje ko buzakomeza gushyira imbere ubuvuzi bufite ireme kandi bushingiye ku bumuntu, mu rwego rwo gufasha abarwayi gukira neza haba ku mubiri no ku mutima.

Kwizihiza Umunsi Mpuzamahanga w’Abarwayi byabaye umwanya wo gusubiza amaso inyuma, hibutswa ko ubuzima bw’umuntu bugira agaciro kandi ko impuhwe ari imwe mu nkingi zituma serivisi z’ubuvuzi zirushaho gutanga umusaruro.

Imihigonews.rw