Gatsibo: Koperative Coproriz irimo kubaka iduka ry’umuhinzi rigamije kwegereza serivisi abanyamuryango bayo

Coperative y'abahinzi b'ubumuceri n'ibigori ya coproriz Ntete

Iri duka rizajya ritangirwamo ibikoresho byose bikenerwa mu buhinzi ku giciro cy’ikiranguzo, mu rwego rwo kongera umusaruro n’iterambere ry’abahinzi.

Koperative y’abahinzi b’umuceri n’ibigori ya Coproriz Ntende, ikorera mu gishanga cya Ntende mu murenge wa rugarama Mu karere ka Gatsibo Intara y'uburasirazuba gifite hegitari 900, irimo kubaka iduka ry’umuhinzi rigamije kwegereza serivisi n’ibikoresho by’ubuhinzi abanyamuryango bayo 3,762, hagamijwe kugabanya ibiciro ku isoko no guteza imbere umusaruro w’ubuhinzi.

Coproriz Ntende ni imwe muri koperative z’icyitegererezo mu bijyanye n’ubuhinzi n’iterambere ry’abahinzi mu gace ikoreramo. Usibye ubuhinzi bw’umuceri n’ibigori, iyi koperative igenda yagura ibikorwa byayo mu nzego zitandukanye, hagamijwe kuzamura imibereho myiza y’abanyamuryango bayo.

Coproriz Ntende ihinga ku buso bungana na hegitari 900 zigabanyijemo hegitari 600 zihingwaho umuceri, mu gihe hegitari 300 zihingwaho ibigori ahantu hatagera amazi neza. Ibi bikorwa by’ubuhinzi ni byo shingiro ry’iterambere ry’iyi koperative.

Mu rwego rwo kurushaho gufasha abanyamuryango bayo kubona ibikoresho by’ubuhinzi hafi yabo, iyi koperative irimo kubaka iduka ry’umuhinzi, rizajya ritangirwamo imbuto z’indobanure, ifumbire, imiti y’imyaka n’ibindi bikoresho by’ibanze bikenerwa mu buhinzi.

Sinzamuhara Jean de Dieu, Umuyobozi mukuru wa Koperative Coproriz Ntende, yavuze ko iri duka rizajya ritangirwamo ibicuruzwa ku giciro cy’ikiranguzo, bityo abanyamuryango bakabasha kubigura badahenzwe ku isoko risanzwe.

Yagize ati: “Iri duka tuzirikanamo inyungu z’abanyamuryango bacu, aho bazajya babona ibikoresho byose bikenerwa mu buhinzi hafi yabo kandi ku giciro gito ugereranyije n’isoko.”

Uretse ubuhinzi, Coproriz Ntende ifite n’ibindi bikorwa by’iterambere birimo ubworozi bw’inkoko ndetse na Hoteli ya Ntende ifite inyenyeri ebyiri (2), ifite ibyumba 27 byakira abayigana. Biteganyijwe ko imirimo yo kuyagura nirangira, izaba ishobora kwakira abantu 47 ku ijoro.

Koperative Coproriz Ntende ifite abanyamuryango 3,762, barimo abagore 1,382 n’abagabo 2,380, igaragaza uruhare rugaragara rw’abagore mu iterambere ry’ubuhinzi n’imishinga rusange.

Iyubakwa ry’iduka ry’umuhinzi rya Coproriz Ntende ritezweho kuzamura ireme ry’ubuhinzi, kongera umusaruro no kugabanya igihombo cy’abahinzi giterwa no kugura ibikoresho ku giciro kiri hejuru. Ibi kandi bigaragaza ko koperative zikomeje kuba inkingi y’iterambere rirambye n’imibereho myiza y’abaturage.

 

IMIHIGO NEWS | With the best News