Budage: Abagenzi Bahuye n’Ubukonje Bukabije Nyuma y’Imyigaragambyo y’Abashoferi

Abagenzi bo mu gihugu cy’u Budage bahuye n’ikibazo gikomeye cy’ubukonje bukabije mu ma sitasiyo atandukanye, nyuma y’uko abashoferi barenga ibihumbi 10 bahagaritse akazi kubera kutishimira umushahara uri hasi n’imiterere y’akazi kabo.

Iyi myigaragambyo yateguwe n’ishyirahamwe ry’abakozi Verdi, rihagarariye abashoferi n’abandi bakozi bo mu nzego zitandukanye z’umurimo. Iri hagarikwa ry’akazi ryagize ingaruka zikomeye ku bagenzi batari bake bishingikiriza ku modoka zitwara abantu mu buryo bwa rusange.

Verdi yatangaje ko uyu mwanzuro wafashwe nyuma y’ibiganiro byahuje iri shyirahamwe na Guverinoma y’u Budage bitatanze umusaruro,  ku bijyanye no kunoza imibereho n’imikorere y’abashoferi.

Iri shyirahamwe risaba ko abashoferi bagabanyirizwa amasaha y’akazi, bagahabwa umwanya uhagije wo kuruhuka, ndetse bakongererwa umushahara by’umwihariko abakora mu ijoro no mu minsi isoza icyumweru.

Guhagarika akazi kw’abashoferi byagize ingaruka kuri sosiyete zirenga 150 zitwara abantu mu buryo bwa rusange, mu ntara (Länder) 16 zigize u Budage, zirimo Berlin, Hamburg na Bremen, aho ibikorwa by’ubwikorezi byahagaze cyangwa bigakorwa ku kigero gito cyane.