Uburasirazuba bwo Hagati: Ibitero Iran yagabye ku birindiro bya Amerika byangije ibikorwaremezo bifite agaciro ka miliyoni 800$

Raporo nshya igaragaza ko ibitero Iran yagabye ku birindiro bya gisirikare bya Leta Zunze Ubumwe za Amerika mu bihugu byo mu Burasirazuba bwo Hagati byangije ibikorwa bifite agaciro kagera kuri miliyoni 800 z’amadolari ya Amerika mu gihe amakimbirane hagati y’impande zombi akomeje gufata indi ntera.

Amakuru aturuka mu bushakashatsi bwakozwe n’ikigo Center for Strategic and International Studies (CSIS), agaragaza ko n’ubwo hari byinshi byamaze kumenyekana ku byangiritse, igipimo nyacyo cy’ibyangiritse kitaramenyekana neza kubera ko ibitero bikomeje no mu bice bitandukanye.

Iyi raporo ivuga ko mu byangiritse harimo ibikoresho by’ingenzi byifashishwa mu by’umutekano birimo radar, uburyo bw’itumanaho rya satellite n’ibindi bikorwaremezo bifasha ingabo za Amerika mu kugenzura no kurinda ikirere. Muri byo, haravugwamo radar imwe ikomeye yari iherereye muri Jordanie ifite agaciro kagera kuri miliyoni 485$, bivugwa ko yangijwe n’ibitero bya Iran.

Ibitero byibanze ku birindiro bya gisirikare biri mu bihugu birimo Qatar, United Arab Emirates, Kuwait, Bahrain, Jordan, Saudi Arabia na Iraq, aho Amerika ifite ibikorwa bya gisirikare bifite akamaro mu kurinda inyungu zayo muri ako karere.

Amashusho yafashwe hifashishijwe satellite agaragaza ko ibirindiro nka Ali Al-Salim muri Kuwait, Al-Udeid muri Qatar na Prince Sultan muri Arabie Saoudite byahuye n’ibyangiritse bikomeye, nubwo ubuyobozi bwa gisirikare bwa Amerika butaratangaza mu buryo burambuye ingano y’ibyangiritse.

Umwe mu bakoze kuri iyi raporo, Mark Cancian, yavuze ko hari ibyangiritse byinshi bitaratangazwa ku mugaragaro, ati: “Nubwo tumaze kubona ibimenyetso by’ibyangijwe, hari ibindi byinshi bizamenyekana uko amakuru agenda aboneka.”

Ibi bitero bibaye nyuma y’uko amakimbirane hagati ya Iran, Amerika na Israel akomeje gukaza umurego. Amakuru amwe avuga ko mu ntangiriro z’iyi ntambara hagabwe ibitero ku bayobozi bakuru ba Iran, ibintu byakurikiwe n’ibitero byo kwihorera Iran yagabye ku nyungu za Amerika n’iza Israel mu karere.

Ku ruhande rw’ingaruka z’abantu, amakuru atandukanye agaragaza ko abasirikare ba Amerika 13 bamaze kugwa muri iyi mirwano kuva yatangira mu mpera za Gashyantare 2026. Indi mibare itangwa n’imiryango yigenga igaragaza ko abamaze guhitanwa n’iyi ntambara barenga 3200, barimo abasivili benshi.

N’ubwo aya makuru akomeje gusohoka, inzego za gisirikare za Amerika ntiziratangaza ku mugaragaro ibisobanuro birambuye ku byangiritse cyangwa ingamba nshya zafashwe, mu gihe amakimbirane akomeje guteza impungenge ku mutekano w’akarere n’isi muri rusange.

Abasesenguzi bagaragaza ko gukomeza kwiyongera kw’ibi bitero bishobora gutuma umutekano wo mu Burasirazuba bwo Hagati urushaho guhungabana, bigateza ingaruka ku bukungu, ubucuruzi bw’isi ndetse n’umutekano rusange. Harasabwa ibiganiro bya dipolomasi n’ubufatanye mpuzamahanga kugira ngo hagabanywe ubushyamirane bushobora gukura rukagera ku rwego rw’intambara yagutse.